សម្តេច ស ខេង បដិសេធថា លោក ស ថេត ស្នងការក្រុងភ្នំពេញថ្មីមិនមែនជាប្អូនប្រុសសម្តេចទេ
ភ្នំពេញ ៖ ក្រោយពីមានការចុះផ្សាយជាបន្តបន្ទាប់ដោយមានការយល់ច្រឡំថា លោក ស ថេត ដែលត្រូវតែងតាំងជាស្នងការនគរបាលរាជធានីភ្នំពេញថ្មី គឺជាប្អូនប្រុសរបស់សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃនោះ នៅព្រឹកមិញនេះ សម្តេចបានបញ្ជាក់ច្បាស់ថា លោក ស ថេត មិនមែនជាប្អូនរបស់សម្តេចឡើយ។
សម្តេច ស ខេង បានសរសេរនៅលើបណ្តាញសង្គមផ្ទាល់របស់សម្តេចថា “អ្វីដែលខ្ញុំកត់សម្គាល់ និងចង់បញ្ជាក់នៅពេលនេះ គឺសារព័ត៌មានមួយចំនួន បានផ្សព្វផ្សាយថា លោកឧត្តមសេនីយ៍ ស ថេត គឺជាប្អូនបង្កើតរបស់ខ្ញុំ។ ខ្ញុំមិនដឹងថា សារព័ត៌មានទាំងនោះ បានប្រភពមកពីណា ឬក៏សន្និដ្ឋានដោយគ្មានប្រភពនោះទេ ប៉ុន្តែខ្ញុំសូមគូសបញ្ជាក់ថា លោកឧត្តមសេនីយ៍ ស ថេត មិនមែនជាប្អូនបង្កើតរបស់ខ្ញុំ ដូចដែលសារព័ត៌មានមួយចំនួន បានផ្សព្វផ្សាយនោះទេ”៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។