ក្រសួងអប់រំ ច្រានចោលលិខិតក្លែងក្លាយដែលផ្សព្វផ្សាយថា សិស្សប្រឡងសញ្ញាបត្របាក់ឌុប និងឌីប្លូម ឆ្នាំនេះកំណត់ឲ្យ «ជាប់ជាស្ថាពរ»
ក្រសួងអប់រំ ច្រានចោលលិខិតក្លែងក្លាយដែលផ្សព្វផ្សាយថា សិស្សប្រឡងសញ្ញាបត្របាក់ឌុប និងឌីប្លូម ឆ្នាំនេះកំណត់ឲ្យ «ជាប់ជាស្ថាពរ»
ភ្នំពេញ៖ ក្រសួងអប់រំ យុវជន និង កីឡា បានច្រានចោលលិខិតក្លែងក្លាយដែលផ្សព្វផ្សាយថា សិស្សប្រឡងសញ្ញាបត្របាក់ឌុប និងឌីប្លូម ឆ្នាំនេះកំណត់ឲ្យ «ជាប់ជាស្ថាពរ»។
លោក រស់ សុវាចា អ្នកនាំពាក្យក្រសួងអប់រំ យុវជន និង កីឡា បានថ្លែងនៅព្រឹកថ្ងៃទី២៨ ខែតុលានេះ ថា លិខិតមួយដែលបញ្ជាក់ថា «សិស្សថ្នាក់ទី៩ និងថ្នាក់ទី១២ ទាំងអស់នៅឆ្នាំហ្នឹងជាប់ជាស្ថាពរនោះគឺជា លិខិតក្លែងក្លាយនោះទេ ខណៈក្រសួងអប់រំនៅតែបន្តលើកគុណភាពការប្រឡងដដែល ដើម្បីទទួលបានធនធានដែលមានសមត្ថភាពពិតប្រាកដ»។
សូមបញ្ជាក់ថា ថ្មីៗនេះមានការចែកចាយនូវលិខិតក្លែងក្លាយមួយដោយបញ្ជាក់ពី ការជូនដំណឹងស្តីលទ្ធផលនៃការប្រឡងសញ្ញាបត្រមធ្យមសិក្សាបឋមភូមិ និងការប្រឡងសញ្ញាបត មធ្យមសិក្សាទុតិយភូមិ ឆ្នាំសិក្សា ២០២១-២០២២ របស់ក្រសួងអប់រំ យុវជន និងកីឡាចុះថ្ងៃទី២៧ ខែតុលា បានបង្ហាញថា ដោយអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី នៃព្រះរាជាណាចក្រកម្ពុជា ពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្រ មធ្យមសិក្សាបឋមភូមិ ឆ្នាំសិក្សា ២០២១-២០២២ ក្រសួងអប់រំ យុវជន និងកីឡាកំណត់ឲ្យ «ជាប់ជាស្ថាពរ» ចំពោះ «បេក្ខជនទាំងអស់ ដែលបានចុះឈ្មោះប្រឡង» ដោយគ្មានការកំណត់និទ្ទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។