ចាប់ខ្លួនមេបញ្ជាការអាវុធហត្ថក្រុងក្រចេះ ក្រោយប្រើហិង្សា លើកូនឈ្នួល
លោក ទេព ហ៊ុយ មេបញ្ជាការអាវុធហត្ថក្រុងក្រចេះ ត្រូវបានកម្លាំងអាវុធហត្ថចាប់ខ្លួនបន្ទាប់ពីប្រើហិង្សា និងធ្វើទារុណកម្មយ៉ាងធ្ងន់ធ្ងរទៅលើក្មេងស្រីពីរនាក់ ដែលជាឈ្នួលបម្រើក្នុងផ្ទះ រហូតត្រូវបានបញ្ជូនទៅសង្គ្រោះនៅមន្ទីរពេទ្យ។
លោក ឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ បានបញ្ជាក់ថា ឈ្មោះ ទេព ហ៊ុយ ភេទប្រុស អាយុ៤២ឆ្នាំ ឋានន្តរសក្តិវរសេនីយ៍ត្រី មុខងារមេបញ្ជាការមូលដ្ឋានកងរាជអាវុធហត្ថក្រុងក្រចេះ ត្រូវបានឃាត់ខ្លួន នៅថ្ងៃទី៣០ ខែតុលា ឆ្នាំ២០២១ មូលហេតុ បុគ្គលនេះ បានប្រព្រឹត្ត អំពើហិង្សា ទៅលើក្មេងស្រី ដែលជាកូនឈ្នួល (អ្នកបម្រើនៅផ្ទះ)។ ទន្ទឹមនឹងនោះ ក៏បានឃាត់ខ្លួនបុគ្គល ដែលពាក់ព័ន្ធនឹងការប្រព្រឹត្តបទល្មើស ផងដែរ។
សូមបញ្ជាក់ថា ករណីអំពើហិង្សានេះបានកើតឡើងទៅលើក្មេងស្រីកូនឈ្នួល ចំនួន ២នាក់ កាលពីថ្ងៃទី២៧ ខែតុលា ឆ្នាំ២០២១ ។ ដោយក្មេងស្រីទី១. មានឈ្មោះ ត្រែក ធារ៉ា អាយុ ១២ឆ្នាំ និងក្មេងស្រីទី២. ឈ្មោះ រ៉ន ពិសី អាយុ ១២ឆ្នាំដូចគ្នា ជាអ្នកបម្រើនៅផ្ទះលោកវរសេនីយ៍ត្រី ទេព ហ៊ុយ ។ មូលហេតុដែលឈានទៅដល់មានករណីអំពើនេះ បើតាមម្តាយក្មេងស្រីរងគ្រោះថា ដោយសារក្មេងស្រីទាំងពីរ បានធ្វើឲ្យកូនឆ្កែចិញ្ចឹមរបស់ជនបង្កងាប់ ។
ក្រោយពីសត្វឆ្កែនោះងាប់ លោក ទេព ហ៊ុយ បានវា យ ធ្វើបាប ដោយបោចសក់ និងយកជើង ម៉ាជ័រ វាយលើក្បាល ចំនួន ២ជើងម៉ា ហើយកូនចៅលោក ទេព ហ៊ុយ បានវាយទៅលើក្មេងស្រីរងគ្រោះ ចំនួន ៣កំផ្លៀង ។
បើតាមម្តាយស្ត្រីរងគ្រោះដដែល បានរៀបរាប់ប្រាប់សមត្ថកិច្ច ថា ខ្លួនមានការតក់ស្លុតយ៉ាងខ្លាំង បន្ទាប់ពីដឹងថា លោកមេបញ្ជាការកងរាជអាវុធក្រុងក្រចេះ បានប្រើអំពើហិង្សា មកលើកូនរបស់ខ្លួន និង បង្ខំឲ្យស៊ីអាចម៍ឆ្កែ រួចហើយមេប៉េអឹមក៏ឲ្យខ្លួននឹងប្ដីរួម ជាមួយកូនចំនួន សរុប ៦នាក់ មកផ្តិតមេដៃនៅកន្លែង ធ្វើការរបស់គាត់ បង្ខំឲ្យបង់សងប្រាក់ក្នុងមួយខែ១០០ដុល្លារ រយៈពេល៣ឆ្នាំ បើមិនព្រមផ្តិតមេដៃឬអនុវត្តតាមទេត្រូវចាប់កូនដាក់គុក ។
ចំពោះករណីអ្នកនាំពាក្យកងរាជអាវុធហត្ថបានបញ្ជាក់ថា ពេលនេះ មន្ត្រីនគរបាលយុត្តិធម៌ នៃកងរាជអាវុធហត្ថខេត្តក្រចេះ បាននិងកំពុងធ្វើការស៊ើបអង្កេតបឋម តាមនីតិវិធី ដោយមានការដឹកនាំ និងសម្របសម្រួលពីតំណាងអយ្យការអមសាលាដំបូងខេត្តក្រចេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។