ឈ្លោះគ្នាក្នុងវង់ផឹកស៊ីនៅបារថិមភល ប៉ូលិសដកកាំភ្លើងបាញ់ត្រូវជាងភ្លើងម្នាក់រងរបួសធ្ងន់
កាលពីវេលាម៉ោងប្រមាណ៣ទៀបភ្លឺថ្ងៃសុក្រ ទី០៥ ខែវិច្ឆិកា ឆ្នាំ២០២១ មានករណីបាញ់ប្រហារមួយបានកើតឡើង នៅចំណុចភោជនីដ្ឋានថិមភល ស្ថិតក្នុងភូមិស្ទឹងថ្មី សង្កាត់ស្វាយសង្គំ ក្រុងសៀមរាប ដោយបណ្តាលឲ្យបុរសម្នាក់រងរបួស។
បើតាមរបាយការណ៍សមត្ថកិច្ចថា ករណីបាញ់បោះនេះ ជនរងគ្រោះ ឈ្មោះភាព ប៊ុណ្ណារឹទ្ធ ភេទប្រុសអាយុ៣០ឆ្នាំ មុខរបរជាងភ្លេីង នៅភូមិសំរោងត្បូង ឃុំសំរោង ស្រុកសូទ្រនិគម ខេត្តសៀមរាប ត្រូវបានជនដៃដល់ដែលតួនាទីជាសមត្ថកិច្ចបាញ់ចំក្រោមក្លៀកខាងឆ្វេង១គ្រាប់រងរបួសធ្ងន់ ហើយបច្ចុប្បន្នកំពុងសង្រោះបន្ទាន់នៅមន្ទីរពេទ្យបង្អែកខេត្តសៀមរាប។
យ៉ាងណាក៏ដោយ បើតាមលោក ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការខេត្តសៀមរាបថា ករណីនេះ ជនសង្ស័យត្រូវបានប៉ូលិសព្រហ្មទណ្ឌខេត្តសៀមរាបចាប់ខ្លួនបានហើយ។
តាមលោកស្នងការរងថា ករណីនេះ ដំបូងផ្តើមឡើយគឺផ្តើមពីអំពើហិង្សា វាយគ្នា រួចក៏ឈានដល់ការបាញ់។ តែយ៉ាងណា ពេលនេះសមត្ថកិច្ចកំពុងធ្វើការស៊ើបអង្កេតហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។