៤ថ្ងៃ! ខេត្តសៀមរាប ទទួលភ្ញៀវទេសចរជាង ១៤ម៉ឺននាក់
ខេត្តសៀមរាប៖ តាមរបាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា ក្នុងរយៈពេលមួយថ្ងៃ គឺថ្ងៃអាទិត្យ ទី២១ ខែវិច្ឆិកា ឆ្នាំ២០២១ បន្ទាប់ពីចប់ព្រះរាជពិធីបុណ្យអុំទូក បណ្ដែតប្រទីប និង អកអំបុក សំពះព្រះខែ មានភ្ញៀវទេសចរជាតិ និងអន្តរជាតិ មកទស្សនាកម្សាន្តក្នុងខេត្តសៀមរាប មានចំនួន ២៣.០៧៣នាក់ ដែលភាគច្រើនធ្វើដំណើរកម្សាន្តជាលក្ខណៈគ្រួសារ។
របាយការណ៍បានបញ្ជាក់ថា ភ្ញៀវទេសចរជាង ២ម៉ឺននាក់នោះ ភ្ញៀវជាតិមានប្រមាណ ២៣.០០០នាក់ និងភ្ញៀវទេសចរបរទេសផ្ទៃក្នុង មានចំនួន ៧៣នាក់ ក្នុងនោះភ្ញៀវទេសចរមកពីតាមបណ្ដាខេត្តមានប្រមាណពី២៥ ទៅ៣០ភាគរយ ស្មើនឹងប្រមាណពី ៦.០០០ទៅ៧.០០០នាក់ បានធ្វើដំណើរកម្សាន្តទៅកាន់រមណីយដ្ឋានអង្គរ មានចំនួនប្រមាណ ១៤.០០០នាក់ , រមណីយដ្ឋានឧទ្យានជាតិភ្នំគូលែន មានចំនួនប្រមាណ ២.៧០០នាក់ និង សហគមន៍ទេសចរណ៍-អេកូទេសចរណ៍ និងតំបន់់ផ្សេងៗ មានចំនួនប្រមាណ ៦.៣០០នាក់ ។
គួររំលឹកថា បើបូកបន្ថែមនឹងព្រះរាជពិធីបុណ្យអុំទូក បណ្ដែតប្រទីប និង អកអំបុក សំពះព្រះខែផងនោះឃើញថា ក្នុងរយៈពេល ៤ថ្ងៃ គិតចាប់ពីថ្ងៃទី១៨ ដល់ថ្ងៃទី២១ ខែ វិច្ឆិកា ឆ្នាំ២០២១នេះ ខេត្តសៀមរាប មានភ្ញៀវទេសចរដើរកម្សាន្តតាមរមណីយដ្ឋាននានាក្នុងខេត្តនេះ មានចំនួន ១៤១.២១៩នាក់ និង ភ្ញៀវទេសចរបរទេសផ្ទៃក្នុង មានចំនួន ១,២១៩នាក់ ក្នុងនោះ ៖ ភ្ញៀវរជាតិមានចំនួនប្រមាណ ១៤០,០០០នាក់ ដែលភ្ញៀវទេសចរមកពីតាមបណ្តាខេត្តនានា មានចំនួនប្រមាណ ៧០ទៅ៨០ភាគរយ ស្មើនឹងប្រមាណពី១០០.០០០ ទៅ១១០.០០០នាក់ ហើយពួកគាត់បានធ្វើដំណើរកម្សាន្តទៅកាន់រមណីយដ្ឋានអង្គរ មានចំនួនច្រើនជាងគេ គឺប្រមាណជា ៩៣.០០០នាក់ បន្ទាប់មកសហគមន៍ទេសចរណ៍-អេកូទេសចរណ៍ និងតំបន់ផ្សេងៗ មានចំនួនប្រមាណជា ៣១.៦០០នាក់ និងរមណីយដ្ឋានឧទ្យានជាតិភ្នំគូលែនមានចំនួនប្រមាណជា ១៥.៤០០នាក់ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។