ឃាត់ខ្លួនយុវជន ២នាក់ ករណីលួច និងទិញស្លាកលេខរថយន្ត!
ភ្នំពេញ៖ កម្លាំងនគរបាលខណ្ឌច្បារអំពៅ បានឃាត់ខ្លួនជនសង្ស័យចំនួន ២នាក់ ពាក់ព័ន្ធករណីលួចស្លាកលេខរថយន្ត នៅមុខគ្មានលេខ ផ្លូវជាតិលេខ១ ភូមិយកបាត្រ១ សង្កាត់ក្បាលកោះ ខណ្ឌច្បារអំពៅ កាលពីថ្ងៃទី២២ ខែវិច្ឆិកា ឆ្នាំ២០២១។
សមត្ថកិច្ច បានឲ្យដឹងថា ជនរងគ្រោះឈ្មោះ ញឹក វី ភេទប្រុស អាយុ៤៩ឆ្នាំ ជនជាតិខ្មែរ មុខរបរគ្រូពេទ្យ ស្នាក់នៅផ្ទះកើតហេតុ។ ចំណែកជនសង្ស័យទាំង២នាក់នេះ ឈ្មោះ ដែក សារិទ្ធ ភេទប្រុស អាយុ២៨ឆ្នាំ ជនជាតិខ្មែរ មុខរបរគ្មាន ស្នាក់នៅភូមិយកបាត្រ សង្កាត់ក្បាលកោះ ខណ្ឌច្បារអំពៅ និងឈ្មោះឯក ជីវ័ន្ត ភេទប្រុស អាយុ២៣ឆ្នាំ ជនជាតិខ្មែរ មុខរបរគ្មាន ស្នាក់នៅភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល។
សមត្ថកិច្ចបានបន្តថា មុនពេលកើតហេតុជនរងគ្រោះទុករថយន្តម៉ាក Toyota Hilux Revo ពណ៌ស ផ្លាកលេខ ភ្នំពេញ ២BP-៣៤៣៥ នៅចំណុចកើតហេតុ រួចចូលដេកក្នុងផ្ទះស្រាប់តែជនសង្ស័យឈ្មោះដែក សារិទ្ធ លួចផ្លាកលេខ (ភ្នំពេញ២BP-៣៤៣៥) ទាំងមុខ-ក្រោយគេចខ្លួន។
លុះដល់ម៉ោង១៦និង០០នាទី ថ្ងៃដដែល សមត្ថកិច្ចឃាត់ខ្លួនជនសង្ស័យ ឈ្មោះដែក សារិទ្ធ នៅភូមិយកបាត្រ សង្កាត់ ក្បាលកោះ ដកហូតបានស្លាកលេខរថយន្ត(ភ្នំពេញ ២BP-៣៤៣៥) និងស្លាកលេខ១គូទៀត (ភ្នំពេញ ២BA-៦៩៧៥)។ រហូតដល់ម៉ោង១៧និង០០នាទី ថ្ងៃដដែល សមត្ថកិច្ចយើងបន្តឃាត់ខ្លួនជនសង្ស័យម្នាក់ទៀតឈ្មោះឯក ជីវ័ន្ត (អ្នកទិញផ្លាកលេខរថយន្តពីជនសង្ស័យ) ដកហូតម៉ូតូ០១ គ្រឿង ម៉ាកHonda Scoopy ពណ៌ស គ្មានផ្លាកលេខ។ ឃាត់ខ្លួននៅភូមិយកបាត្រ សង្កាត់ក្បាលកោះ។
សមត្ថកិច្ច បញ្ជាក់ថា កន្លងមកជនសង្សយ័ឈ្មោះ ដែក សារិទ្ធ ធ្លាប់លួចផ្លាកលេខរថយន្ត០៥លើក និងធ្លាប់ជាប់ពន្ធនាគារព្រៃស០៣លើក ពីបទជួញដូរគ្រឿងញៀន និងលួច។
បច្ចុប្បន្នជនសង្ស័យ កំពុងឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ ដើម្បីចាត់ការតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។