សង្វែកណាស់! អ្នកទេសចរ ៤៦នាក់ស្លាប់ដោយឆេះរថយន្តក្រុងនៅប៊ុលហ្គារី
រថយន្តក្រុងមួយគ្រឿងបានឆាប់ឆេះនៅលើផ្លូវល្បឿនលឿន ស្ថិតនៅតំបន់ភាគខាងលិចប្រទេសប៊ុលហ្គារី បណ្តាលឲ្យមនុស្សនៅលើរថយន្ត ៤៦នាក់ស្លាប់ ។ ជនរងគ្រោះគឺជាអ្នកទេសចរមកពីតំបន់ភាគខាងជើង Macedonia។
ហេតុការគ្រោះថ្នាក់ខាងលើកើតឡើងនៅថ្ងៃទី ២៣ខែវិច្ឆិកា។ មន្ត្រីគ្រប់គ្រងគ្រោះអាសន្នមកពីក្រសួងមហាផ្ទៃបុលហ្គារី លោក Nikolai Nikolov បានបញ្ជាក់ថា «មានមនុស្ស ៤៥នាក់ស្លាប់ ក្រោយរថយន្តឆាប់ឆេះ។ នៅពេលនេះក្រុមជំនាញកំពុងតែស្រាវជ្រាវ ថាតើរថយន្តឆាប់ឆេះហើយទើបជួបគ្រោះថ្នាក់ ឬគ្រោះថ្នាក់បុកបណ្តាលឲ្យឆាប់ឆេះ»។ ក្រោយមកក្រសួងការពារជាតិក៏បានប្រកាសរបាយការណ៍ចុងក្រោយថាមានអ្នកស្លាប់ ៤៦នាក់ មិនមែន៤៥នាក់ឡើយ។
តាមសារព័ត៌មាន The Guardian បានផ្សាយថា នៅពេលគ្រោះថ្នាក់នៅលើយន្តមានមនុស្សដល់ទៅ ៥៣នាក់។ ក្នុងចំណោមអ្នកស្លាប់មានកុមារផងដែរ ចំណែកអ្នករងរបួស ៧នាក់បានបញ្ជូនទៅកាន់មន្ទីរពេទ្យក្នុងរដ្ឋធានី Sofia ដោយមិនគ្រោះថ្នាក់ដល់អាយុជីវិតនោះឡើយ។
រដ្ឋមន្ត្រីការបរទេស Macedonia លោក Bujar Osmani បានបញ្ជាក់ថា ក្រុមអ្នកទេសចរកំពុងតែធ្វើដំណើរមកកាន់ទីក្រុង Skopje ក្រោយការឈប់សម្រាក់ចុងសប្តាហ៍នៅក្នុងទីក្រុង Istanbul ប្រទេសតួកគី។
នាយករដ្ឋមន្ត្រី ប៊ុលហ្គារី លោក Stefan Yanev បានទៅកាន់កន្លែងកើតហេតុ ត្រួតពិនិត្យស្ថានភាព ។ គ្រោះថ្នាក់នៅលើផ្លូវល្បឿនលឿន Struma មានចម្ងាយពីរដ្ឋធានី Sofia ៤៥គីឡូម៉ែត្រនៅភាគខាងលិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។