ថៃ៖ កូវីដបំប្លែងថ្មីអូមីក្រុង មិនអាចរារាំងគម្រោងបើកទ្វារប្រទេសឡើយ
បច្ចុប្បន្នមានប្រទេសជាច្រើនចាត់វិធានការទប់ស្កាត់ការឆ្លងកូវីដ១៩ បំប្លែងថ្មី Omicron ដែលអង្គការសុខភាពពិភពលោកប្រកាសថា មានហានិភ័យខ្ពស់។ ប្រទេសជាច្រើនក៏បានសម្រេចរិតត្បិតអ្នកដំណើរមកពីទ្វីបអាហ្វ្រិក ហើយថៃក៏ដូចគ្នានោះដែរ។ ប៉ុន្តែគម្រោងបើកទ្វារប្រទេសទទួលអ្នកទេសចរមកពីតំបន់ផ្សេងក្រៅពីអាហ្វ្រិកនៅតែដំណើរការតាមគម្រោងដដែល។
រដ្ឋាភិបាលទីក្រុងបាងកក់បានប្រកាសថា នឹងមិនពន្យាពេលបើកទ្វារប្រទេសនោះឡើយបើទោះបីមានករណីឆ្លងកូវីដ ១៩ បំប្លែងថ្មី Omicron ក្តី។ រដ្ឋមន្ត្រីក្រសួងទេសចរណ៍ថៃ លោក Phiphat Ratchakitprakar នៅថ្ងៃទី២៩ខែវិច្ឆិកាបានប្រកាសថា ប្រទេសនេះនឹងមិនផ្លាស់ប្តូរគម្រោងបើកទ្វារប្រទេសដូចការគ្រោងទុកនោះឡើយ។
រដ្ឋមន្ត្រីក្រសួងទេសចរណ៍ថៃបានបញ្ជាក់ថា ក្នុងថ្ងៃដំបូងដែលបើកទ្វារវិស័យទេសចរណ៍ ថៃទទួលបានអ្នកទេសចរបរទេសជាង ១សែននាក់ គឺកើនឡើង៣ដង ។ នេះជាក្តីសង្ឃឹមដើម្បីដំណើរការសេដ្ឋកិច្ចប្រទេសជាតិឡើងវិញ។
តាមគម្រោង ថៃនឹងទាក់ទាញអ្នកទេសចរប្រមាណ ពី៣សែននាក់ទៅ៤សែននាក់ នៅចុងឆ្នាំ២០២១នេះ ពិសេសក្នុងឱកាសបុណ្យគ្រិស្តស្មាស់។
ពាក់ព័ន្ធករណីឆ្លងកូវីដ ១៩ ក្នុងប្រទេសថៃ ក្រសួងសុខាភិបាលថៃ បានប្រកាសថា បានរកឃើញករណីឆ្លងជំងឺ COVID-19 ថ្មីៗចំនួន ៤,៣០៦ករណីបន្ថែមទៀត ក្នុងរយៈពេល ២៤ម៉ោងចុងក្រោយនេះ។
ក្រៅពីការរកឃើញករណីឆ្លងថ្មីៗខាងលើ អ្នកជំងឺចំនួន ៣៧នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរ ក្នុងរយៈពេល ២៤ម៉ោងចុងក្រោយដូចគ្នា ខណៈអ្នកជំងឺចំនួន ៦,៤០៧នាក់ផ្សេងទៀត ត្រូវបានអនុញ្ញាតឱ្យចាកចេញពីមន្ទីរពេទ្យ ក្រោយជាសះស្បើយ។
មកទល់ពេលនេះ ប្រទេសថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសចំនួន ២,១១៥,៨៧២ករណី ក្នុងនោះមានអ្នកស្លាប់ ២០,៧៧១នាក់ និងអ្នកជាសះស្បើយឡើងវិញ ២,០១៩,៤២៨នាក់។ គិតត្រឹមពេលនេះ ថៃបានចាក់វ៉ាក់សាំងបង្ការជំងឺ COVID-19 សរុប ៩២.៦៨លានដូស ក្នុងនោះប្រជាជន ៤១.២៨លាននាក់ (៥៩.០១% នៃចំនួនប្រជាជនសរុប) បានទទួលការចាក់គ្រប់ដូស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។