ដីព្រៃលិចទឹកជាង ១០០ហិកតា ត្រូវជនខិលខូចកាប់ទន្ទ្រានយក នៅខេត្តសៀមរាប
ខេត្តសៀមរាប៖ កាលពីថ្ងៃទី៣០ ខែវិច្ឆិកា ឆ្នាំ២០២១ ឯកឧត្តម ទៀ សីហា អភិបាល នៃគណៈអភិបាលខេត្ត បានដឹកនាំក្រុមការងារចម្រុះថ្នាក់ខេត្ត រួមមានលោក លោកស្រី ជាអភិបាលរង នៃគណៈអភិបាលខេត្ត រដ្ឋបាលក្រុង-ស្រុក និងមន្ទីរ-អង្គភាពជំនាញពាក់ព័ន្ធ ចុះពិនិត្យទីតាំងជាក់ស្ដែងនៅតំបន់ការពារបឹងទន្លេសាបក្នុងភូមិសាស្ត្រក្រុងសៀមរាប ដើម្បីអនុវត្តតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ស្រាវជ្រាវលើករណីជនល្មើសដែលបានកាប់ទន្ទ្រានរំលោភយកដីព្រៃលិចទឹកធ្វើជាកម្មសិទ្ធិ ។
ឯកឧត្តម ទៀ សីហា មានប្រសាសន៍ថា ដើម្បីអនុវត្តតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ឲ្យកាន់តែមានប្រសិទ្ធភាពនោះ រដ្ឋបាលខេត្តបានបង្កើតក្រុមការងារថ្នាក់ខេត្តទទួលបន្ទុកអនុវត្តការងារតាមបណ្តាក្រុង-ស្រុក ទាំង០៦ ដែលជាប់នឹងបឹងទន្លេសាប ដោយក្រុមការងារនីមួយៗដឹកនាំដោយលោក លោកស្រី ជាអភិបាលរង នៃគណៈអភិបាលខេត្ត ការអនុវត្តតាមបទបញ្ជារបស់សម្តេចតេជោ ហ៊ុន សែន គឺត្រូវធ្វើឲ្យបានហ្មត់ចត់ និងឆាប់រហ័ស ព្រមទាំងស្វែងរករាល់ជនល្មើសដែលបានកាប់បំផ្លិញបំផ្លាញព្រៃលិចទាំងនេះ ហើយត្រូវដកហូតមកធ្វើជាកម្មសិទ្ធរបស់រដ្ឋ ព្រមទាំងដាំដើមឈើទាំងនោះឡើងវិញ ដើម្បីជាជម្រកត្រីពងកូន ។
ឯកឧត្តមមានប្រសាសន៍ទៀតថា ក្នុងឱកាសចុះពិនិត្យមើលព្រៃលិចទឹក ស្ថិតនៅក្នុងភូមិសាស្ត្រក្រុងសៀមរាប ដែលមានផ្ទៃដីប្រមាណជាង៨ពាន់ហិកតានេះ ក្នុងនោះត្រូវបានកាត់ឆ្វៀលជូនពលរដ្ឋប្រមាណពីរពាន់ហិកតា ហើយផ្ទៃដីព្រៃលិចទឹកប្រមាណជាង១០០ហិកតា ត្រូវបានជនខិលខូចកាប់ព្រៃទន្ទ្រានយកដី ដែលជនខិលខូចទាំងនោះមានចំនួនជិត៥០នាក់ រស់នៅក្នុងសង្កាត់ជ្រាវ , សង្កាត់ក្របីរៀល , សង្កាត់ស្រង៉ែ , សង្កាត់ស្វាយដង្គុំ និងសង្កាត់មួយចំនួនទៀត ដោយពួកគេធ្វើសកម្មភាពចាប់តាំងពីឆ្នាំ២០១៤មកម្លេះ ។
ឯកឧត្តមអភិបាលខេត្តសៀមរាប មានប្រសាសន៍បន្ថែមថា ក្រោយពីរកឃើញនិងកំណត់ជនល្មើសហើយ អាជ្ញាធរក៏បានបានប្ដឹងទៅតុលាការរួចរាល់ហើយដែរ រីឯព្រៃលិចទឹកស្ថិតនៅក្នុងភូមិសាស្ត្រក្នុងស្រុកចំនួន៥ទៀត អាជ្ញាធរកំពុងទៅពិនិត្យមើលពីការបាត់បង់ដោយសារជនខិលខូចកាប់ព្រៃទន្ទ្រានយកដីនេះ។
លោក ឡោ រ៉ន ប្រជាសហគមន៍នៅសង្កាត់ចុងឃ្នៀស ក្រុងសៀមរាប បានលើកឡើងថា ពួកគាត់មានការសប្បាយចិត្ដក្រោយពេលរាជរដ្ឋាភិបាលបានបញ្ជាឱ្យអាជ្ញាធរខេត្ដ ទប់ស្កាត់ជនខិលខូចទន្ទ្រានយកដីព្រៃលិចទឹកនេះ ខណៈកន្លងមក ផ្ទៃដីព្រៃលិចទឹកបានរងការកាប់បំផ្លាញយ៉ាងខ្លាំងដើម្បីយកដីធ្វើជាកម្មសិទ្ធិ ដូចជាធ្វើស្រែប្រាំង និងធ្វើការលក់ដូរជាដើម ហើយរឹបអូសការយកដីព្រៃលិចទឹកពីជនខិលខូចវិញនេះ នឹងធ្វើឱ្យមច្ឆាជាតិកើនឡើងវិញនៅក្នុងទន្លេសាប ព្រោះព្រៃលិចទឹកមានសារៈសំខាន់សម្រាប់ជម្រកត្រីពងកូន ។
សូមបញ្ជាក់ថា ផ្ទៃដីព្រៃលិចទឹកនៅបឹងទន្លេសាប ដែលស្ថិតនៅក្នុងភូមិសាស្ត្រក្រុង-ស្រុកចំនួន៦ នៃខេត្ដសៀមរាប មានស្រុកជីក្រែង , ស្រុកសូទ្រនិគម , ស្រុកប្រាសាទបាគង , ក្រុងសៀមរាប , ស្រុកពួក និងស្រុកក្រឡាញ់ មានទំហំជាង១២ម៉ឺនហិកតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។