អភិបាលខេត្តសៀមរាប ចុះស្រាវជ្រាវការកាប់បំផ្លាញព្រៃលិចទឹក ក្នុងតំបន់បឹងទន្លេសាប ក្នុងភូមិសាស្ត្រស្រុកជីក្រែង
ខេតតសៀមរាប៖ កាលពីថ្ងៃទី០១ ខែធ្នូ ឆ្នាំ២០២១ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងឯកឧត្តម ទៀ សីហា អភិបាលខេត្តសៀមរាប បានដឹកនាំក្រុមការងារ ចុះពិនិត្យមើលផែនទីទិន្នន័យលើផ្ទៃដីក្នុងតំបន់២ និងតំបន់៣ ក្នុងដែនសមត្ថកិច្ចរបស់រដ្ឋបាលស្រុកជីក្រែង ក្នុងការទប់ស្កាត់ជនខិលខូចដែលលួចកាប់បំផ្លាញតំបន់ព្រៃលិចទឹកបឹងទន្លេសាប។
តាមសេចក្តីរាយការណ៍របស់លោក ពៅ ប៊ុនធឿន អភិបាលនៃគណៈអភិបាលស្រុកជីក្រែង បានឲ្យដឹងថា ទិន្នន័យនៃការកាត់ឆ្វៀលផ្ទៃដី ស្ថិតនៅក្នុងដែនព្រៃលិចទឹកតំបន់៣ នៃបឹងទន្លេសាប ឆ្នាំ២០១២ នៅក្នុងភូមិសាស្ត្រស្រុកជីក្រែង មានទំហំ ៣.៩៧៩ហិកតា ដោយគ្រប់ដណ្តប់លើឃុំចំនួន៧របស់ស្រុក ព្រមទាំងបានបោះបង្គោលកំណត់ព្រំប្រទល់តំបន់៣ និង មានការកំណត់និយមការកាត់ឆ្វៀល ដីស្រែ ៣៥៦ចំណុច និង បានប្រគល់ឲ្យឃុំថែរក្សាបង្គោលតម្រុយ ក្នុងការទប់ស្កាត់ការកាប់រុករានដីព្រៃលិចទឹក ក្នុងតំបន់៣ ។
តាមរបាយការណ៍របស់ខ័ណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា ក្នុងឆ្នាំ២០១៦ ដល់២០២១នេះ ការបង្ក្រាបបទល្មើសចូលរុករានព្រៃលិចទឹកក្នុងតំបន់៣ ក្នុងឃុំទាំង៧របស់ស្រុកជីក្រែង មានចំនួន៨៦ករណី ស្មើនឹងផ្ទៃដី ៧៤៥,៨៨ហិកតា ព្រមទាំងបានកំណត់មុខ សញ្ញាបទល្មើស និងជនល្មើសដាក់ទៅតុលាការផងដែរ។
ឯកឧត្តម ទៀ សីហា មានប្រសាសន៍ថា ព្រៃលិចទឹកនេះមានសារៈសំខាន់សម្រាប់ទីជម្រកត្រីពងកូន និងជីវៈចម្រុះ នៅក្នុងបឹងទន្លេសាប តែបើសិនព្រៃលិចទឹកបាត់បង់ជារៀងរាល់ឆ្នាំនោះ វានឹងធ្វើឲ្យប៉ះពាល់យ៉ាងច្រើនដល់ជីវៈចម្រុះ ជាពិសេសទិន្នផលត្រី និង មានការថយចុះជារៀងរាល់ឆ្នាំ ព្រមទាំងសត្វស្លាបទៀតផង ជាពិសេសព្រៃលិចទឺកក៏មានសក្តានុពលមួយទៀតដែរលើវិស័យទេសចរណ៍ ព្រោះក្រៅពីដំណើរដើរទស្សនាកម្សាន្ត នៅតាមប្រាង្គប្រាសាទនានា និង រមណីយដ្ឋានធម្មជាតិក្នុងខេត្ត ភ្ញៀវបានបន្តមកទស្សនាកម្សាន្តនៅតំបន់បឹងទន្លេសាប នូវព្រៃលិចទឹក និងសត្វស្លាបទៀតផងដែរ ដូច្នេះក្នុងនាមអាជ្ញាធរខេត្ត សូមថ្លែងអំណរគុណដល់សម្តេចតេជោ ដែលបានផ្តល់ឱកាសឲ្យអាជ្ញាធរ បញ្ចប់នៃការកាប់ទន្ត្រានព្រៃលិចទឹកបន្តទៀត នៅក្នុងភូមិសាស្ត្រខេត្តសៀមរាប។
ឯកឧត្តមបន្តទៀតថា ក្រោយពេលដកហូនដីដែលជនខិលខូច ធ្វើការកាប់ឈួសឆាយ នៅក្នុងតំបន់៣នេះហើយនោះ មន្ទីរជំនាញពាក់ព័ន្ធ និងអាជ្ញាធរមូលដ្ឋានដែលមានភូមិសាស្ត្រ ជាប់បឹងទន្លេសាប ត្រូវរួមសហការគ្នាធ្វើការដាំដុះកូនឈើឡើងវិញ នៅក្នុងផ្ទៃដីទាំងនោះ ព្រមទាំងធ្វើការថែរក្សា តាមដានរាល់សកម្មភាពរបស់ជនខិលខូច នៅតែបន្តធ្វើការរុករាននៅក្នុងដីតំបន់៣នេះ និងត្រូវធ្វើការឃាត់ខ្លួនជាបន្ទាន់ បញ្ជូនទៅកាន់តុលាការ ។
ម្យ៉ាងទៀតដំណាក់ការនេះយើងត្រូវការពារតំបន់ដែលបានកាត់ឆ្វៀល និង ពិនិត្យទៅលើតំបន់ ដែលបានកាប់រានថ្មី នៅក្នុងតំបន់៣នោះ ដើម្បីធ្វើសេចក្តីរាយការដាក់ជូនទៅឯកឧត្តម ឧបនាយករដ្ឋមន្ត្រីផងដែរ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។