Apple គ្រោងដាក់បង្ហាញ iPhone 5G និង iPad ម៉ូដែលថ្មី នៅពេលឆាប់ៗនេះ
សារព័ត៌មាន Bloomberg បានរាយការណ៍នៅថ្ងៃសុក្រថា ក្រុមហ៊ុន Apple គ្រោងដាក់បង្ហាញ iPhone 5G និង iPad ម៉ូដែលថ្មីដែលមានតម្លៃទាបនៅថ្ងៃទី០៨ ខែមីនា ឆ្នាំ២០២២ ខាងមុខនេះ។
បើយោងតាមការចេញផ្សាយរបស់សារព័ត៌មាន CNBC នៅថ្ងៃទី០៤ ខែកុម្ភៈ ឆ្នាំ២០២២បានឱ្យដឹងថា បច្ចុប្បន្ន Apple បានផ្តល់ជូននូវ iPhone ដែលមានតម្លៃទាបមួយគឺម៉ូដែល iPhone SE ដែលត្រូវបានដាក់បង្ហាញនៅកំឡុងខែមីនា និង ខែមិថុនាឆ្នាំ២០២០កន្លងទៅ ដោយមានតម្លៃលក់រាយត្រឹមតែ ៣៩៩ដុល្លារអាមេរិកប៉ុណ្ណោះ។ ខណៈដែលវាគឺជាម៉ូដែល iPhone ថ្មីបំផុតដែលបំពាក់បច្ចេកវិទ្យា5G ហើយភ្ជាប់មកជាមួយនឹងមុខងារពិសេសដែលអាចស្គេនម្រាមដៃ (Touch ID) បានទៀតផង។
ចំណែកឯ iPad ថ្មីដែលគេរំពឹងថាជាកំណែអាប់ដេតរបស់ iPad Air ដោយបច្ចុប្បន្ននេះបានដាក់លក់នៅក្នុងតម្លៃ ៥៩៩ដុល្លារអាមេរិក ខណៈដែល iPad គឺជាខ្សែសង្វាក់ផលិតផលសំខាន់តែមួយគត់របស់ Apple ដែលបានរាយការណ៍ពីការធ្លាក់ចុះនៃការលក់នៅក្នុងអំឡុងត្រីមាសខែធ្នូ ហើយប្រហែលជាការដាក់បង្ហាញ iPad Air ម៉ូដែលថ្មីនៅប៉ុន្មានថ្ងៃខាងមុខនេះតម្លៃអាចចុះមកនៅត្រឹមតែ ៣២៩ដុល្លារអាមេរិក។
ចំពោះ ការអាប់ដេត Version ថ្មីក្រុមហ៊ុន Apple អាចនឹងកំណត់ពេលវេលា នឹងព្រឹត្តិការណ៍ដូចគ្នាទៅនឹងការដាក់បង្ហាញដើម្បីសម្ភោធជាមួយនឹងការចេញផ្សាយជាផ្លូវការនៃ iOS 15.4 ដែលជាកំណែអាប់ដេតចុងក្រោយបំផុតរបស់ iPhone ហើយបច្ចុប្បន្ននេះ iOS 15.4 គឺកំពុងស្ថិតនៅក្នុងការសាកល្បងដែលត្រូវបានគេរំពឹងថានឹងរួមបញ្ចូលមុខងារថ្មីៗជាច្រើន រួមទាំងសមត្ថភាពប្រើប្រាស់ការសម្គាល់ផ្ទៃមុខ ដើម្បីដោះសោរនៅពេលពាក់ម៉ាស និង មាន Emoji ថ្មីៗជាច្រើនទៀត។
គួរជម្រាបផងដែរថា ព្រឹត្តិការណ៍ដែលនឹងធ្វើឡើងនៅថ្ងៃទី០៨ ខែមីនា ឆ្នាំ២០២២ខាងមុខ ត្រូវបានគេដឹងថានឹងជាប្រភេទព្រឹត្តិការណ៍តាមអនឡាញ ដូចដែល Apple ធ្លាប់ធ្វើ ២ ឆ្នាំចុងក្រោយអញ្ចឹង ដោយមិនមានមនុស្សចូលរួមទស្សនានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។