ច្រកព្រំដែនអូស្មាច់ បើកដំណើរការឡើងវិញ ក្រោយបិទអស់ជាង២ឆ្នាំ ដោយវិបត្តិកូវីដ១៩
ច្រកទ្វារអន្តរជាតិអូរស្មាច់ ដែលស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ត្រូវបានបើកដំណើរការឱ្យប្រជាពលរដ្ឋប្រទេសទាំពីរបានធ្វើដំណើរឆ្លងកាត់ឡើងវិញហើយ កាលពីថ្ងៃទី៦ ខែឧសភា ឆ្នាំ២០២២ បន្ទាប់ពីច្រកមួយនេះបានបិទជាបណ្តោះអាសន្នដោយភាគីថៃអស់រយៈពេលជាង២ឆ្នាំ ដោយសារកូវីដ-១៩។
ពិធីបើកច្រកទ្វារអន្តរជាតិអូរស្មាច់ជាផ្លូវការឡើងវិញនាពេលនេះ ធ្វើឡើងក្រោមវត្តមាន អភិបាលខេត្តឧត្តរមានជ័យ និងអភិបាលខេត្តសុរិន្ទ ប្រទេសថៃ និងមន្ត្រីពាក់ព័ន្ធ កងកម្លាំងប្រដាប់អាវុធនៃប្រទេសទាំងពីជាច្រើនរូបទៀត។
ការបើកដំណើរការច្រកទ្វារព្រំដែនអន្តរជាតិអូរស្មាច់នាថ្ងៃនេះ ភាគីកម្ពុជា និងភាគីថៃ បានកំណត់ថា ជាការបើកសាកល្បងបណ្តោះអាសន្ន បើសិនជាដំណើរការបើកច្រកនេះប្រព្រឹត្របានទៅដោយរលូនមិនមានបញ្ហានោះ ភាគីថៃនឹងលុបចោលលក្ខខណ្ឌតឹងរឹងមួយចំនួនទៀត ដើម្បីឱ្យការចេញចូលរបស់ប្រជាពលរដ្ឋនៃប្រទេសទាំង២ បានដំណើរការដូចធម្មតាឡើងវិញ ដូចមុនពេលមានវិបត្តិជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។