អាជ្ញាធរខេត្តសៀមរាប ប្រកាសពីការរៀបចំព្រឹត្តិការណ៍ជិះកង់ដើម្បីបរិស្ថាន និងសុខភាពកុមារ នៅថ្ងៃទី១៤ ខែសីហាខាងមុខនេះ
សៀមរាប៖ នៅថ្ងៃទី១២ ខែសីហា ឆ្នាំ២០២២នេះ អាជ្ញាធរខេត្តសៀមរាប បានប្រកាសថា គណៈកម្មាធិការជិះកង់ដើម្បីកម្ពុជា សហការជាមួយក្រុមហ៊ុន ខេមបូឌាសាយភ្លើង ក្រុមហ៊ុន ចាយ៉ាខេតធើរីង ក្រុមហ៊ុនត្រាវែលលូប និង ហាងលក់ឬជួលកង់ អាំង គឹមសាន្ដ នឹងរៀបចំព្រឹត្តិការណ៍ជិះកង់ដើម្បីបរិស្ថាន និងសុខភាពកុមារ ឆ្នាំទី៨ ក្នុងគោលបំណងរៃអង្គាសថវិកា ដើម្បីឧបត្ថម្ភដល់មន្ទីរពេទ្យកុមារអង្គរ ដែលជាការរួមចំណែកក្នុងការជួយសង្គ្រោះ និងលើកកម្ពស់សុខុមាលភាពកុមារកម្ពុជា ដែលជាទំពាំងស្នងឫស្សី និងជាសសរទ្រូងប្រទេសជាតិនាពេលអនាគត។
ព្រឹត្តិការណ៍នេះនឹងប្រព្រឹត្តទៅនៅថ្ងៃអាទិត្យ ទី១៤ ខែសីហា ឆ្នាំ២០២២ វេលាម៉ោង ០៦៖០០នាទី ដែលជួបជុំគា្ននៅផ្លូវ ៦០ម៉ែត្រ ហើយអាជ្ញាធរខេត្តសៀមរាប ក៏បានអំពាវនាវដល់មន្ត្រីរាជការទាំងអស់ក្នុងខេត្ត សូមចូលរួមក្នុងព្រឹត្តិការណ៍នេះឱ្យបានច្រើនកុះករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។