ការប្រកួតកីឡាវ៉ូវីណាម ជើងឯកថ្នាក់ជាតិ ឆ្នាំ២០២២ ត្រូវបានប្រកាសបិទជាផ្លូវការ!
រាជធានីភ្នំពេញ៖ ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡាបានមានប្រសាសន៍ថា ការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិឆ្នាំ២០២២ ពិតជាមានសារៈសំខាន់ណាស់សម្រាប់កីឡាករកីឡាការិនី ដើម្បីអភិវឌ្ឍខ្លួន បង្កើនសមត្ថភាព ក្នុងការប្រកួតថ្នាក់ជាតិនេះ ក៏ដូចជាការប្រកួតលក្ខណៈអន្តរជាតិ ជាពិសេសការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះជាប្រវត្តិសាស្ត្រ។
ឯកឧត្តមអនុរដ្ឋលេខាធិការបានស្នើឲ្យ សហព័ន្ធបន្តយកចិត្តទុកដាក់ឲ្យបានយ៉ាងខ្លាំងទាំងផ្នែករដ្ឋបាល សកម្មភាពការប្រកួត និងសកម្មភាពលើផ្នែកវគ្គបណ្តុះបណ្តាលគ្រូបង្វឹក អាជ្ញាកណ្តាល ចៅក្រម តាមសហព័ន្ធកីឡាជាតិទាំងអស់ដែលក្រសួងបានផ្តល់ថវិកាគាំទ្រ ដើម្បីជួយពន្លឿនការអភិវឌ្ឍវិស័យកីឡា ឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ២០២៣។
ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជាថ្លែងថា ការប្រកួតជើងឯកថ្នាក់ជាតិប្រចាំឆ្នាំ២០២២ គឺជាការប្រកួតដ៏សំខាន់ បន្ទាប់ពីការខិតខំប្រឹងប្រែងហ្វឹកហាត់ សម្រាប់កីឡាករ កីឡាការិនី អភិវឌ្ឍ និងបង្កើនសមត្ថភាព រួមទាំងអាជ្ញាកណ្ដាល-ចៅក្រម និងមន្ដ្រីបច្ចេកទេសរៀបចំការប្រកួតផងដែរ។
តាមរយៈការបន្តកិច្ចខិតខំយ៉ាងខ្លាំងក្លាបានជំរុញឲ្យប្រភេទកីឡាវ៉ូវីណាមកម្ពុជាទទួលបានសមិទ្ធផលប្រសើរជូនជាតិ និងប្រជាជនកម្ពុជាប្រមាណ ១៧លាននាក់ ក្នុងការប្រកួតស៊ីហ្គេម លើកទី៣១ នៅវៀតណាម កាលពីខែឧសភា ឆ្នាំ២០២២កន្លងទៅនេះ ដោយដណ្ដើមបានមេដាយសរុប ១៤គ្រឿង ក្នុងនោះមានមាស ៣ ប្រាក់២ និងសំរឹទ្ធ៩ ការប្រកួតកីឡាវ៉ូវីណាមជើងឯកថ្នាក់ជាតិមានរយៈពេល៣ថ្ងៃ ចាប់ពីថ្ងៃទី១៧-១៩ ខែកញ្ញា ឆ្នាំ២០២២។
លោក យ៉ាំ ថៃសាន អគ្គលេខាធិការសហព័ន្ធកីឡាវ៉ូវីណាមកម្ពុជា គូសបញ្ជាក់ថា ការប្រកួតកីឡាវ៉ូវីណាមជើងឯកថ្នាក់ជាតិឆ្នាំ២០២២នេះ មានក្លិបមកពីរាជធានី-ខេត្តចំនួន៦ ក្រសួង២ ចូលរួម កីឡាការិនី ៥៨នាក់ កីឡាការិនី ២៤ នាក់ ការប្រកួតចែកជា២ផ្នែកធំៗ ១៩ វិញ្ញាសា រួមមាន៖ ១- វិញ្ញាសា មេគុន ចំនួន ១២ និង២- វិញ្ញាសាប្រយុទ្ធ ចំនួន ០៧។
ចំពោះលទ្ធផលជ័យលាភីរួមមាន៖ គឺក្លិបកីឡាវ៉ូវីណាម ក្រសួងការពារជាតិឈរនៅចំណាត់ថ្នាក់លេខ១ដោយដណ្ដើមបានមេដាយច្រើនជាងគេ សរុប ១៥គ្រឿង (មាស ៩ ប្រាក់ ២ និងសំរឹទ្ធ ៤) ខណៈខេត្តស្វាយរៀង ឈរលេខ២ ដណ្ដើមបានមេដាយសរុប ៦គ្រឿង (មាស ២ ប្រាក់ ៣ និងសំរឹទ្ធ ១) និងក្រសួងមហាផ្ទៃ ឈរលេខ៣ ឈ្នះមេដាយមាស ២ ប្រាក់ ២ និងសំរឹទ្ធ ១០ សរុប ១៤គ្រឿង។ ចំណែកឯក្លិបខណ្ឌសែនសុខ ឈរលេខ៤ ឈ្នះមេដាយសរុប ១០គ្រឿង (មាស ២ ប្រាក់ ២ និងសំរឹទ្ធ ៦) និងខេត្តកំពង់ស្ពឺ ឈរលេខ៥ ឈ្នះមេដាយសរុប ៣គ្រឿង រួមមានមេដាយមាស ២ និងប្រាក់ ១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។