ក្រុមប្រឹក្សាខេត្តព្រៃវែង ប្តឹងក្រុមប្រឹក្សាខេត្តព្រះវិហារ ករណីស៊ីដាច់ដីជាង៨០ហិកតានៅស្រុកកំចាយមារ
ព្រះវិហារ ៖ លោក ប្រាក់ សុវណ្ណ អតីតអភិបាលខេត្តព្រះវិហារ និងបច្ចុប្បន្នជាប្រធានក្រុមប្រឹក្សាខេត្តព្រះវិហារ និងលោកស្រី ស ចេង ដែលជាភរិយា បានរងការចោទប្រកាន់ថា អាងអំណាចបានក្លែងបន្លំឯកសាររំលោ.ភយកដីអ្នកដទៃចំនួន២កន្លែង ដែលមានទំហំ៨៤ហិចតា នៅខេត្តព្រៃវែងធ្វើជាកម្មសិទ្ធិផ្ទាល់ខ្លួន ទាំងដឹងថា ដីទាំងនេះ មានម្ចាស់ត្រឹមត្រូវទៅហើយនោះ។
លោក ភេ អ៊ីម សមាជិកក្រុមប្រឹក្សាខេត្តព្រៃវែង ដែលអះអាងថា ជាម្ចាស់ដីខាងលើ បានធ្វើលិខិតស្នើរសុំការអន្តរាគមន៏ពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។ លោកបានបានរៀបរាប់នៅក្នុងលិខិតនោះថា កាលពីឆ្នាំ១៩៩៨ លោកបានឲ្យលោកប្រាក់ សុវណ្ណ រួមជាមួយមនុស្សចំនួន៥នាក់ទៀត រួមមាន ១- ឈ្មោះ សៅ សុវណ្ណ, ២- ឈ្មោះ ចាប អេង, ៣- ឈ្មោះ ប៊ុន ដួង, ៤- ឈ្មោះ គង់ ម៉ាឡេត និង៥- ឈ្មោះ ឥន ភឿន ជួយរៀបចំដីឲ្យចំនួន២កន្លែង។
លោក ភេ អ៊ីម បានរៀបរាប់ជូនសម្ដេចក្រឡាហោម បន្តទៀតថា ដីទាំង២កន្លែងនោះ ទី១- មានទំហំ៧៥០ម៉ែត្រគុណនិង៨០០ម៉ែត្រ ស្មើនឹង៦០ហិចតា មានទីតាំងស្ថិតនៅចំណុចស្វាយបៀក ភូមិវាលស្មាច ឃុំក្របៅ ស្រុកកំចាយមារ ខេត្តព្រៃវែង។ ទីតាំងទី២- មានទំហំ៣០០ម៉ែត្រគុណនិង៨០០ម៉ែត្រស្មើនឹង២៤ហិចតា មានទីតាំងស្ថិតនៅចំណុចត្រពាំងគូ ភូមិត្បូងវត្ត ឃុំក្របៅ ស្រុកកំចាយមារ ខេត្តព្រៃវែង។
គាត់បានបន្តថា ក្រោយមកដីរបស់លោកទាំង២កន្លែងនោះ បានត្រូវបានលោកប្រាក់ សុវណ្ណ ប្រធានក្រុមប្រឹក្សាខេត្តព្រះវិហារ និងលោកស្រី ស ចេង ដែលជាភរិយា ក្បត់ទំនុកចិត្តលួចធ្វើលិខិតកាន់កា.ប់រហូតដល់បច្ចុប្បន្ន ដោយមានហត្ថលេខាទទួលស្គាល់ត្រឹមអាជ្ញាធរភូមិនិងឃុំ។
លោកភេ អ៊ីម បានប្រាប់ឲ្យដឹងបន្ថែមថា លោកបានទិញដីខាងលើ ពីប្រជាពលរដ្ឋច្រើនគ្រួសារនៅក្នុងភូមិ-ឃុំខាងលើ និងមានឯកសារត្រឹមត្រូវស្របច្បាប់ ប៉ុន្តែទីបំផុតបែរជាក្លាយទៅជាជនរងគ្រោះទៅវិញ ។ ដោយត្រូវបានលោកប្រាក់ សុវណ្ណ និងភរិយា ក្លែងឯកសាររំលោ.ភយកដីទាំងអស់គ្មានសល់ ក្រោយពីទទួលរងការរំលោ.ភបំពានបែបនេះ លោកក៏បានដាក់ពាក្យប្ដឹងទៅកាន់អាជ្ញាធរ ដើម្បីទាមទារយកដីរបស់លោកមកវិញ។
ម្ចាស់ដីរូបនេះបានបញ្ជាក់ថា ក្រោយពេលលោកដាក់ពាក្យបណ្ដឹង កន្លងមកអាជ្ញាធរស្រុកកំចាយមារបានធ្វើការដោះស្រាយជូនជាបន្តបន្ទាប់ដែរ ប៉ុន្តែពុំទទួលបានលទ្ធផលឡើយ។ ជាហេតុធ្វើឲ្យរឿងទំនាស់ដីធ្លីនេះ អូសបន្លាយរហូតមកដល់បច្ចុប្បន្ន ហើយក្នុងនាមលោកជាម្ចាស់ដីពិតប្រាកដ ពុំអាចស៊ូទ្រាំរងភាពអយុត្តិធម៌ និងការឈឺចាប់តទៅទៀតបានឡើយ ។ ដូច្នេះទើបលោកធ្វើលិខិតស្នើសុំការអន្តរាគមន៏ពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីសម្ដេចជ្រាប និងជួយរកយុត្តិធម៌ជូនរូបលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។