សហព័ន្ធកីឡាវូស៊ូកម្ពុជា បានរៀបចំវគ្គបណ្តុះបណ្តាលមន្ត្រីបច្ចេកទេស អាជ្ញាកណ្ដាល ចៅក្រមកីឡាវូស៊ូ
លោក ម៉ៅ ចន្ថាវុធ អគ្គលេខាធិការ សហព័ន្ធកីឡាវូស៊ូកម្ពុជាគូសបញ្ជាក់ថា វគ្គបណ្តុះបណ្តាលមន្ត្រីបច្ចេកទេស អាជ្ញាកណ្ដាល ចៅក្រមកីឡាវូស៊ូ ដំណើរការពីថ្ងៃទី ១០ដល់ថ្ងៃទី ១៨ខែវិច្ឆិកា ឆ្នាំ២០២២ នៅវិមានពហុកីឡដ្ឋានជាតិ រាជធានីភ្នំពេញ ដោយអនុវត្តតាមកិច្ចព្រមព្រៀងស្ដីពីការអនុវត្តថវិកាគាំទ្ររបស់ក្រសួងអប់រំ យុវជន និងកីឡា ឆ្នាំ២០២២ សម្រាប់ពន្លឿនការអភិវឌ្ឍសហព័ន្ធកីឡាជាតិ ឆ្ពោះទៅចូលរួមការប្រកួតកីឡាស៊ីហ្គេម លើកទី ៣២ ឆ្នាំ២០២៣ ដែលប្រទេសកម្ពុជាយើងធ្វើជាម្ចាស់ផ្ទះ។ សហព័ន្ធកីឡាវស៊ូកម្ពុជាបានរៀបចំបើកវគ្គបណ្តុះ បណ្ដាលលមន្ត្រីបច្ចេកទេស-អាជ្ញាកណ្ដាល-ចៅក្រមកីឡាវ៉ូស៊ូ បង្កើនចំណេះដឹងបន្ថែមទៀត។
អគ្គលេខាធិការរូបនេះអះអាងថា សិក្ខាកាមបានមកពីបណ្តាក្លិបនានា ដោយផ្ដោតលើការសិក្សា បច្ចេកទេសវិញ្ញាសាថាវលូ (សម្ដែង) និងវិញ្ញាសា សាន់ដា (ប្រយុទ្ធ) ឲ្យកើនឡើងទាំងបរិមាណ និងគុណភាពពីកម្រិតមូលដ្ឋានមកជាកម្រិតជាតិ និងឈានទៅកាន់កម្រិតអន្តរជាតិថែមទៀតផង។ ពិសេសបង្កើនសមត្ថភាព ដែលអាចចូលរួមក្នុងព្រឹត្តិការណ៍ប្រកួតជាលក្ខណៈអន្តរជាតិ ក្នុងព្រឹត្តិការប្រកួតកីឡាស៊ីហ្គេមឆ្នាំ២០២៣។ វគ្គសិក្សានេះមានចំនួន ០៩ ថ្ងៃ និងមានមន្ត្រីកីឡាចូលរួមសរុបចំនួន៤៤ នាក់ គិត ទាំងគ្រូឧទ្ទេស និងសិក្ខាកាម។
លោក ប៉ែន វុទ្ធី អនុប្រធានទទួលបន្ទុករួមនាយកដ្ឋានអប់រំកាយ និងកីឡានៃក្រសួងអប់រំ យុវជន និងកីឡាបានលើកឡើងថា វគ្គនេះពិតជាមានសារៈសំខាន់ណាស់ ដើម្បីពង្រឹងសមត្ថភាពមន្ត្រីបច្ចេកទេសអាជ្ញាកណ្តាល ចៅក្រមកីឡាវូស៊ូ សម្រាប់បម្រើដល់ការប្រកួតថ្នាក់ជាតិ និងអន្តរជាតិនាពេលខាងមុខ ជាពិសេស គឺការប្រកួតកីឡាជាតិលើកទី៣ នាថ្ងៃទី២១-៣០ ខែវិច្ឆិកា ឆ្នាំ២០២២ និងការប្រកួតកីឡាស៊ីហ្គេម លើកទី៣២ ដែលនឹងដំណើរការជាផ្លូវការពីថ្ងៃទី៥-១៧ ខែឧសភា ឆ្នាំ២០២៣។
ជាមួយគ្នានេះ លោកអនុប្រធានទទួលបន្ទុករួមនាយកដ្ឋានបានស្នើសុំឲ្យសិក្ខាកាមទាំងអស់ខិតខំក្រេបយកចំណេះដឹងពីគ្រូឧទ្ទេសឲ្យបានល្អប្រសើរ ដើម្បីយកទៅអនុវត្តការងារ ក្នុងនាមជាមន្ត្រីអាជ្ញាកណ្តាល ចៅក្រម ពេលប្រកួតស៊ីហ្គេម ឆ្នាំ២០២៣។ ក្រោយពីក្រសួងអប់រំ យុវជន និងកីឡាបានប្រគល់អំណាចទាំងស្រុងលើផ្នែករដ្ឋបាល បច្ចេកទេស រួមទាំងថវិកាគាំទ្រជូនដល់សហព័ន្ធកីឡាជាតិទាំងអស់ ក្រសួងនឹងបានមើលឃើញពីភាពរឹងមាំរបស់សហព័ន្ធក្នុងការរៀបចំមន្ត្រីបច្ចេកទេស សម្រាប់ការប្រកួតនានា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។