ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិឆ្នាំ២០២២ លើកទី២៧ មានអ្នកចូលរួមជិត៨ពាន់នាក់ មកពី៦៩ប្រទេស ជុំវិញពិភពលោកនៅរមណីយដ្ឋានអង្គរ
សៀមរាប៖ ព្រឹត្តការណ៍រត់ពាក់កណ្តាលម៉ារ៉ាតុងអន្តរជាតិឆ្នាំ២០២២ លើកទី២៧ បានចាប់ផ្តើមសាជាថ្មីនៅលើទឹកដីអង្គរ នាព្រឹកថ្ងៃទី០៤ ខែធ្នូ ឆ្នាំ២០២២ ដែលមានអ្នកចូលរួមជាជនជាតិខ្មែរ និងបរទេសជាច្រើនប្រមាណជិត៨ពាន់នាក់ មកពី៦៩ប្រទេស ជុំវិញពិភពលោក។
អញ្ជើញចូលរួម ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ តំណាងឯកឧត្តម ហង់ ពៅ អគ្គនាយកអាជ្ញាធរជាតិអប្សរា ឯកឧត្តម អ៉ឹង គឹមលាង អភិបាលរងខេត្តសៀមរាប និងអាជ្ញាធរពាក់ព័ន្ធមួយចំនួនទៀត។
សូមបញ្ជាក់ដែរថា ការរត់ប្រណាំងពាក់កណ្ដាលម៉ារ៉ាតុងអន្តរជាតិនេះ ត្រូវបានរៀបចំធ្វើជារៀងរាល់ឆ្នាំនៅខេត្តសៀមរាប ក្នុងគោលបំណងសំខាន់ ក្រៅពីការបំផុសកីឡានេះដល់ប្រជាពលរដ្ឋលេងកីឡាដើម្បីសុខភាព និងរួមចំណែកវិស័យទេសចរណ៍ រួមទាំងផ្សព្វផ្សាយតំបន់បេតិកភណ្ឌពិភពលោក មានប្រាង្គប្រាសាទនៃតំបន់អង្គរ ក៏ដើម្បីផ្សារភ្ជាប់មនុស្សធម៌ដោយការស្វែងរកមូលនិធិកាកបាទក្រហម មន្ទីរពេទ្យគន្ធបុប្ផា អង្គការសប្បុរសជាតិ និងអន្តរជាតិនានានៅកម្ពុជា។ ម្យ៉ាងទៀត ក៏ដើម្បីផ្សព្វផ្សាយព្រឹត្តិការណ៍ប្រវត្តិសាស្ត្រស៊ីហ្គេម និងអាស៊ានប៉ារ៉ាហ្គេមនៅកម្ពុជា ឆ្នាំ២០២៣ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។