រាប់រយនាក់ត្រូវចាប់ខ្លួននៅបារាំង ក្រោយប៉ូលិស៤៥នាក់រងរបួស និងរថយន្តជាង៥០០គ្រឿងត្រូវដុតបំផ្លាញក្នុងកុបកម្មហិង្សា
រដ្ឋាភិបាលបារាំងបាននិយាយកាលពីថ្ងៃអាទិត្យថា មនុស្សរាប់រយនាក់ទៀតត្រូវបានចាប់ខ្លួននៅក្នុងកុបកម្មដល់យប់ទីប្រាំបង្កឡើងដោយកំហឹងសាធារណៈជនចំពោះការសម្លាប់ក្មេងជំទង់អាយុ១៧ឆ្នាំម្នាក់ដោយប៉ូលិស នៅពេលប៉ូលិសបន្ថែមកម្លាំងទៅកាន់បណ្តាទីក្រុងដែលជាចំណុចផ្ទុះការប៉ះទង្គិចនៅទូទាំងប្រទេស។
អ្នកប្រឆាំងតវ៉ា ដែលភាគច្រើនមានវ័យក្មេងៗ បានដុតរថយន្ត បំផ្លាញហេដ្ឋារចនាសម្ពន្ធនិងប៉ះទង្គិចជាមួយប៉ូលិសក្នុងពេលពួកគេបញ្ចេញកំហឹងចាប់តាំងពីប៉ូលិសម្នាក់បាញ់សម្លាប់យុវជន ណាអែន មីស្យឺ(Nahel M.)ក្នុងចម្ងាយជិតនៅពេលជននេះមិនគោរពភ្លើងចរាចរណ៍កាលពីថ្ងៃអង្គារ។
ប៉ូលិស៤៥នាក់រងរបួស រថយន្ត៥៧៧គ្រឿងត្រូវដុតបំផ្លាញ អាគារ៧៤ក៏ត្រូវដុតអោយឆេះនិងអគ្គិភ័យ៨៧១កើតមាននៅលើដងវិថីនិងទីតាំងសាធារណៈផ្សេងៗ។ស្ថានីយប៉ូលិសជាង២០ក៏ត្រូវបានរងការវាយប្រហារផងដែរ។
ការសម្លាប់ក្មេងនេះត្រូវបានថតជាប់ក្នុងវីដេអូ និងត្រូវបានចែកចាយក្នុងបណ្តាញសង្គមជាហេតុនាំអោយបញ្ឆេះកំហឹងចំពោះអំពើហិង្សារបស់ប៉ូលិសលើក្រុមជនជាតិភាគតិច ដែលបង្កជាភាពតានតឹងខាងជាតិសាសន៍នៅបារាំង។
នៅមួយថ្ងៃក្រោយណាអែនត្រូវបានបញ្ចុះនៅទីបប្រជុំជនកំណើតក្បែរក្រុងប៉ារីស ក្រសួងមហាផ្ទៃបារាំងបាននិយាយថា ប៉ូលិសបានចាប់ខ្លួនមនុស្ស៧១៩នាក់ក្រោយការចាប់ខ្លួនប្រមាណ១.៣០០នាក់នៅយប់មុននោះ។
ក្នុងពេលជាមួយគ្នា អភិបាលទីប្រជុំជនមួយនៅខាងត្បូងក្រុងប៉ារីស បាននិយាយថាពួកបាតុករបានបើ់ករថយន្តបុកចូលផ្ទុះរបស់លោក ដោយបណ្តាលអោយភរិយានិងកូនរបស់លោកម្នាក់រងរបួសនិងដុតបំផ្លាញរថយន្ត។
ចំណែកនាយករដ្ឋមន្ត្រី អេលីហ្សាបេត បន(Elisabeth Borne)បានហៅការវាយប្រហារនេះថា«មិនអាចអត់ឳនអោយបាន»នៅពេលក្រុមរដ្ឋអាជ្ញាចាត់ទុកវាជាអំពើប៉ងឃាតកម្ម។
សូមបញ្ជាក់ថា ប៉ូលិសប្រមាណ៤៥.០០០នាក់ត្រូវបានដាក់ពង្រាយនៅទូទាំងបារាំង ហើយកម្លាំងជំនួយត្រូវបានបញ្ជូនទៅកាន់កន្លែងផ្ទុះការប៉ះទង្គិចខ្លាំងរួមមានទីក្រុងលីយ៉ុង ក្រុងក្រូណូបល៍និងម៉ាសី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។