សមត្ថកិច្ចក្រុងប៉ោយប៉ែត បង្ក្រាបទីតាំងខារ៉ាអូខេ «SKY KTV» ឃាត់មនុស្សប្រុសស្រីជាង ១០០នាក់ ពាក់ព័ន្ធករណីចែកចាយ និងប្រើប្រាស់គ្រឿងញៀន
កម្លាំងនគរបាលក្រុងប៉ោយប៉ែត ខេត្តបន្ទាយមានជ័យ បានបើកប្រតិបត្តិការចុះបង្ក្រាបទីតាំងខារ៉ាអូខេមួយកន្លែងយីហោ «SKY KTV» ក្រោយសង្ស័យពាក់ព័ន្ធករណីចែកចាយ និងប្រើប្រាស់គ្រឿងញៀន ហើយឈានដល់ការឃាត់ខ្លួនមនុស្សប្រុសស្រី ចំនួន១០៧នាក់ ក្នុងនោះជនបរទេស៤២នាក់។
សេចក្ដីរាយការណ៍បានឲ្យដឹងថា ប្រតិបត្តិការនេះបានធ្វើឡើងនៅយប់ថ្ងៃទី០៤ ខែវិច្ឆិកា ឆ្នាំ២០២៣ ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក្រោមការសម្របសម្រួលពីលោក លឹម ប៊ុនសុភ័ក្រ ព្រះរាជអាជ្ញារង នៃអយ្យការអមសាលាដំបូងខេត្ត និងដឹកនាំប្រតិបត្តិការដោយលោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត។
សមត្ថកិច្ចបានបញ្ជាក់ថា ក្នុងប្រតិបត្តិការនេះកម្លាំងជំនាញបានឃាត់ខ្លួនជនសង្ស័យចំនួន១០៧នាក់ ស្រី៤០នាក់ ក្នុងនោះជនបរទេសចំនួន៤២នាក់ ស្រី៧នាក់ រួមមាន៖ ឥណ្ឌូនេស៉ី ចំនួន២១នាក់, វៀតណាម ចំនួន១៥នាក់, ចិន ចំនួន៣នាក់, ថៃ ចំនួន៣នាក់។ ក្រៅពីនេះ ដកហូតបានម្ស៉ៅក្រាមពណ៌សថ្លា ចំនួន៦កូនថង់ និង១កូនថង់តូច, ថ្នាំកញ្ចប់ពណ៌ក្រហម (រូបសេះ) ១កញ្ចប់, ពណ៌ក្រហម (រូបទំពាំងបាយជូរ) ១កញ្ចប់, ពណ៌លឿង ១០កញ្ចប់, ពណ៌ទឹកក្រូច ១កញ្ចប់ និងកញ្ចប់ថ្នាំពណ៌ក្រហមអក្សរ (LV) ១កញ្ចប់។
ទីតាំងខារ៉ាអូខេ «SKY KTV» ត្រូវបានបិទបណ្តោះអាសន្ន រីឯជនសង្ស័យប្រុស ស្រីទាំងនេះ ត្រូវបាននគរបាលឃាត់ខ្លួនសួរនាំ និងធ្វើតេស្តរកសារធាតុញៀន ដើម្បីចាត់ការបន្តតាមនីតិវិធី៕
ប្រភព៖ Fresh News
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។