កម្ពុជាសម្រេចលុបចោលថ្ងៃឈប់សម្រាកចំនួន៧ថ្ងៃ ដោយផ្ដើមអនុវតន៍ចាប់ពីឆ្នាំ២០២០ខាងមុខ
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា កម្ពុជា នឹងលុបចោលថ្ងៃឈប់សម្រាកបុណ្យ និងទិវាចំនួន៧ថ្ងៃ ដែលផ្ដើអនុវត្តន៍ចាប់ពីឆ្នាំ២០២០ទៅ ដើម្បីរួមចំណែកដល់ការលើកកម្ពស់ផលិតភាព និងសម្រួលពាណិជ្ជកម្មរបស់កម្ពុជាបន្ថែមទៀត។
សម្ដេចតេជោបានមានប្រសាសន៍ថា លោកឧកញ៉ា វ៉ាន់ សូអៀង ប្រធានសមាគរោងចក្រកាត់ដេរនៅកម្ពុជា បានស្នើសុំឲ្យរាជរដ្ឋាភិបាលពិចារណាកាត់បន្ថយថ្ងៃសម្រាកបុណ្យ និងទិវា។ ជាការពិតយើងពិនិត្យឃើញថា ថ្ងៃឈប់សម្រាកប្រចាំឆ្នាំនៅកម្ពុជាមានចំនួនច្រើនជាងប្រទេសជិតខាង។
សម្តេចតេជោបានបន្តថា សម្រាប់កម្ពុជានាពេលកន្លងមក យើងមានថ្ងៃឈប់សម្រាកពី២៨ ទៅ៣០ថ្ងៃ ក្នុងមួយឆ្នាំ នៅពេលដែលប្រទេសជិតខាង ដូចជា វៀតណាម មានតែ១៣ថ្ងៃ ប្រទេសឡាវមានតែ១២ថ្ងៃ ប្រទេសថៃមាន១៦ថ្ងៃ ប្រទេសសិង្ហបុរីមាន ១១ថ្ងៃ។
សម្ដេចតេជោបានគូសបញ្ជាក់បន្ថែមថា ការកាត់បន្ថយចំនួនថ្ងៃឈប់សម្រាកការងារនេះ គឺមិនមែនមានន័យថា ជាការលុបបំបាត់ចោលនូវពិធីបុណ្យ ព្រះរាជពិធី និងទិវាជាតិ អន្តរជាតិ ដែលរាជរដ្ឋាភិបាល និងប្រជាជនកម្ពុជា តែងតែប្រារព្ធធ្វើយ៉ាងខ្ជាប់ខ្ជួនកន្លងមកនោះទេ ក៏ប៉ុន្តែចំថ្ងៃនៃការប្រារព្ធពិធីនោះ មន្ត្រីរាជការក្នុងវិស័យសាធារណៈ និងនិយោជិត កម្មករក្នុងវិស័យឯកជនទាំងអស់ត្រូវបំពេញការងារជាធម្មតា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។