ធនាគារពិភពលោក គ្រោងនឹងផ្តល់ហិរញ្ញប្បទានប្រមាណ១ ប៊ីលានដុល្លារអាម៉េរិកដល់កម្ពុជាសម្រាប់៥ឆ្នាំខាងមុខ
នាចុងខែឧសភានេះ ក្រុមប្រឹក្សាភិបាលនាយកប្រតិបត្តិ ធនាគារពិភពលោក នឹងពិនិត្យអនុម័ត ក្របខ័ណ្ឌភាពជាដៃគូជាមួយកម្ពុជា សម្រាប់៥ឆ្នាំខាងមុខ (២០១៩-២០២៣) ដែលគ្រោងនឹង ផ្តល់ហិរញ្ញប្បទានប្រមាណ១ប៊ីលានដុល្លារអាម៉េរិក។
គណៈប្រតិភូនៃក្រុមប្រឹក្សានាយកប្រតិ បត្តិប្រចាំធនាគារពិភពលោក បានបង្ហើបពីគម្រោងផ្តល់ហិរញ្ញប្បទាននេះ ក្នុងជំនួបជាមួយឯកឧត្តម វង្សី វិស្សុត រដ្ឋមន្រ្តីស្តីទីនៃក្រសួងសេដ្ឋកិច្ច និងហិរញ្ញវត្ថុនៅទីស្តីការក្រសួងកាល ពីថ្ងៃទី០៩ ខែឧសភា ឆ្នាំ២០១៩។
គណៈប្រតិភូនៃក្រុមប្រឹក្សានាយកប្រតិបត្តិប្រចាំធនាគារពិភព លោក បានសម្ដែងនូវការកោតសរសើរចំពោះសមិទ្ធផលលេចធ្លោជាច្រើន ដែលកម្ពុជាសម្រេចបានក្នុងកិច្ចអភិវឌ្ឍន៍សេដ្ឋកិច្ច-សង្គម ជាពិសេសការសម្រេចបាននូវកំណើនសេដ្ឋកិច្ច ខ្ពស់ច្រើនឆ្នាំជាប់គ្នា, ការកាត់បន្ថយភាពក្រីក្រ, ការគ្រប់គ្រងអត្រាអតិផរណាបានល្អ ក្នុង កម្រិតមួយទាប និងព្រមទាំងការសម្រេចបាននូវគោលដៅអភិវឌ្ឍន៍ផ្សេងទៀតបានល្អប្រសើរ ដូចជា វិស័យអប់រំ និងសុខាភិបាលជាដើម។ ជាងនេះទៅទៀត ការគ្រប់គ្រងបំណុល សាធារណៈបានយ៉ាងល្អរបស់កម្ពុជា កំពុងក្លាយជាករណីសិក្សា និងរៀនសូត្រដកពិសោធន៍ មួយរបស់ស្ថាប័នអន្តរជាតិធំៗ និងប្រទេសមួយចំនួន។
ជាមួយគ្នានេះ លើមូលដ្ឋាននៃភាពជោគជ័យនេះ ធនាគារពិភពលោក បានត្រៀមខ្លួនជាស្រេចក្នុងការបន្តគាំទ្រ និងធ្វើដំណើរកាន់តែស្វាហាប់ថែមទៀត រួមជាមួយរាជរដ្ឋាភិបាលក្នុងបេសកកម្មអភិវឌ្ឍន៍សេដ្ឋកិច្ច និងសង្គមកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។