ថ្ងៃទី២០ កក្កដា ខាងមុខ ស្តេចប្រដាល់ហ្វីលីពីន Pacquiao នឹងឡើងសង្វៀន នៅអាមេរិកម្តងទៀត
ប្រព័ន្ធផ្សព្វផ្សាយហ្វីលីពីន កាលពីថ្ងៃទី១១ ខែឧសភា ឆ្នាំ២០១៩ បានផ្សាយថា កីឡាករ Manny Pacquiao នៅថ្ងៃទី២០ ខែកក្កដា ឆ្នាំ២០១៩ ខាងមុខនេះ នឹងឡើងសង្វៀនម្តងទៀត នៅលើទឹកដីអាមេរិក ដើម្បីប្រកួតដណ្តើមខ្សែក្រវាត់ទម្ងន់មធ្យមរបស់សមាគមប្រដាល់អន្តរជាតិ (WBA) ។
កីឡាករអាមេរិក ដែលជួបក្រួតជាមួយ Manny Pacquiao គឺកីឡាករ Keith Thurman ។ បណ្តាញទូរទស្សន៍ Fox Television របស់អាមេរិកក៏បានផ្សព្វផ្សាយអំពីគម្រោងឡើងសង្វៀនរបស់កីឡាករមួយគូនេះដែរ ។
សូមបញ្ជាក់ថា កីឡាករ Keith Thurman ជាកឡាករប្រដាល់របស់អាមេរិក ដែលមិនទាន់ស្គាល់រសជាតិថាបរាជ័យនៅឡើយទេ ។ ប្រវត្តិប្រកួតរបស់គេ បានចំនួន២៩ដង គឺឈ្នះរហូត ហើយបានផ្ដួលដៃគូឲ្យសន្លប់បានចំនួន២២ដង ។
ចំណែកស្តេចប្រដាល់ហ្វីលីពីន Manny Pacquiao វិញ ប្រវត្តិប្រកួតចុងក្រោយ កាលពីថ្ងៃទី១៩ ខែមករា ឆ្នាំ២០១៩ បានយកឈ្នះលើកីឡាករអាមេរិក Adrien Broner ក្រោយចប់ការប្រកួត១២ទឹក នៅសង្វៀនសហរដ្ឋអាមេរិក ។ ស្តេចប្រដាល់ Manny Pacquiao ធ្លាប់ប្រកួតបាន៧០ដង ក្នុងនោះឈ្នះ៦១ដង ហើយផ្តួលដៃគូឲ្យសន្លប់៣៩ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។