កម្ពុជា និងនេប៉ាល់ ចុះហត្ថលេខាលើឯកសារចំនួនពីរ ស្ដីពីកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ
ឯកសារចំនួនពីរ រវាងកម្ពុជា និងនេប៉ាល់ ត្រូវបានចុះហត្ថលេខា បន្ទាប់ពីជំនួបទ្វេរភាគីរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចល្រកម្ពុជា និង ឯកឧត្ដម ខេ ភី សាម៉ា អូលី (The Rt. Hon’ble K. P. Sharma Oli) នាយករដ្ឋមន្រ្តីនៃសាធារណរដ្ឋសហព័ន្ធប្រជាធិបតេយ្យនេប៉ាល់ នាល្ងាចថ្ងៃទី ១៣ ខែឧសភា ឆ្នាំ២០១៩នៅវិមានសន្តិភាព ក្នុងខណៈដែលឯកឧត្ដមដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅព្រះរាជាណាចក្រកម្ពុជា។
ឯកសារទាំងនោះរួមមាន ១.កិច្ចព្រមព្រៀងក្របខ័ណ្ឌ ស្តីពី ពាណិជ្ជកម្មនិងការវិនិយោគ ចុះហត្ថលេខាដោយ ឯកឧត្ដម កេដា បាហាដួ អាឌីការី(Kedar Bahadur Adhikari ) រដ្ឋលេខាធិការ ទទួលបន្ទុកឧស្សាហកម្ម ពាណិជ្ជកម្មនិងផ្គត់ផ្គង់ នេប៉ាល់ (secretary for industry commerce and supply of Nepal )និងឯកឧត្តម ប៉ាន សូរស័ក្ក រដ្ឋមន្ត្រីក្រសួងពាណិជ្ជកម្មនៃព្រះរាជាណាចក្រកម្ពុជា។ ២.អនុស្សរណៈយោគយល់ស្តីពីកិច្ចសហប្រតិបត្តិការ ទ្វេភាគី រវាងសភាពាណិជ្ជកម្ម នេប៉ាល់ និងសភាពាណិជ្ជកម្ម កម្ពុជា ចុះហត្ថលេខាដោយ ឯកឧត្ដម រ៉ាយេស កាហ្ស៊ី ស្រេស្តា(Rajesh Kazi SHRESTA) ប្រធានសភាពាណិជ្ជកម្មណេប៉ាល់ និងឧកញ៉ា លឹម ហេង អនុប្រធានសភាពាណិជ្ជកម្មកម្ពុជា។
គួរបញ្ជាក់ដែរថា ឯកឧត្ដម ខេ ភី សាម៉ា អូលី (The Rt. Hon’ble K. P. Sharma Oli) នាយករដ្ឋមន្ត្រីនៃសាធារណរដ្ឋសហព័ន្ធប្រជាធិបតេយ្យនេប៉ាល់ និងលោកជំទាវ បានដឹកនាំគណៈប្រតិភូជាន់ខ្ពស់ អញ្ជើញមកបំពេញទស្សនកិច្ចផ្លូវការរយៈពេល៣ថ្ងៃ នៅព្រះរាជាណាចក្រកម្ពុជា (ចាប់ពីថ្ងៃទី ១៣ ដល់ថ្ងៃទី១៥ ខែឧសភា ឆ្នាំ២០១៩) ដែលជាការតបតាមការអញ្ជើញរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
បើតាមកម្មវិធីដែលបានគ្រោងទុក ក្នុងអំឡុងស្នាក់អាស្រ័យ និងបំពេញទស្សនកិច្ចនៅកម្ពុជា ឯកឧត្ដម ខេ ភី សាម៉ា អូលី នាយករដ្ឋមន្ត្រីនេប៉ាល់ គ្រោងនឹងជួបសម្តែងការគួរសមជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភាផងដែរ។ ជាងនេះទៀត ឯកឧត្ដម ខេ ភី សាម៉ា អូលី ត្រូវបានរំពឹងថា នឹងថ្លែងសុន្ទរកថាគន្លឹះនៅក្នុងវេទិកាធុរកិច្ចកម្ពុជា-នេប៉ាល់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។