ព្រលានយន្ដហោះថ្មី នៅខេត្តសៀមរាប សម្រេចបានជាង៣០ភាគរយហើយ គ្រោងនឹងបញ្ចប់ការសាងសង់ នៅក្នុងឆ្នាំ២០២៣
ខេត្តសៀមរាប៖ ឯកឧត្ដម ស៊ីន ចាន់សិរីវុត្ថា អនុរដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិល មានប្រសាសន៍ថា ការសាងសង់ព្រលានយន្ដហោះអន្តរជាតិថ្មីនៅខេត្តសៀមរាប ដែលអនុវត្តដោយក្រុមហ៊ុនអភិវឌ្ឍន៍របស់ចិន AIAI (Angkor International Airport Investment) មកដល់ពេលនេះ សម្រេចបានជាង៣០ភាគរយហើយ ហើយបើផ្អែកលើសកម្មភាព ដែលក្រុមហ៊ុនបានបង្កើនការងាទាំងយប់ទាំងថ្ងៃ ដើម្បីឲ្យសម្រេចគោលដៅដូចអ្វីដែលកម្ពុជាបានគ្រោងទុកនោះ ដូច្នេះការសាងសង់អាកាសយានដ្ឋាននេះ គ្រោងនឹងបញ្ចប់ទាំងស្រុង និងដាក់ឲ្យដំណើរការនៅឆ្នាំ២០២៣ខាងមុខ បើទោះបីកម្ពុជាក៏ដូចជាសកលោក កំពុងជួបវិបត្ដិជំងឺកូវីដ១៩ក្ដី ប៉ុន្ដែការសាងសង់អាកាសយានដ្ឋានអន្ដរជាតិថ្មីនៅតែដំណើរការជាធម្មតា ។
ឯកឧត្ដម ស៊ីន ចាន់សិរីវុត្ថា មានប្រសាសន៍យ៉ាងដូច្នេះ ក្នុងឱកាសអមដំណើរឯកឧត្តមនាយឧត្តមសេនីយ៍បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរស៊ីវិល ដឹកនាំមន្ត្រីជាន់ខ្ពស់ និងមន្ត្រីជំនាញ ចុះត្រួតពិនិត្យ ការសាងសង់អាកាសយានដ្ឋានអន្តរជាតិសៀមរាបអង្គរថ្មី កាលពីថ្ងៃទី២៣ ខែធ្នូ ឆ្នាំ២០២០ម្សិលមិញនេះ ។
គួររំលឹកថា គោលបំណងក្នុងបេសកកម្មនេះ គឺត្រួតពិនិត្យការងារ៖
១. ផែនការសាងសង់អាកាសយានដ្ឋានទាំងមូល ( Overall Schedule)
២. សេចក្ដីរាយការណ៍អំពីវឌ្ឍនៈភាពគម្រោងសាងសង់អាកាសយានដ្ឋាន ឆ្នាំ២០២០ ( Project Progress in 2020)
៣. ផែនការសាងសង់អាកាសយានដ្ឋានឆ្នាំ២០២១ (Construction Plan for 2021)
៤. វិធានការត្រួតពិនិត្យ និងការបង្ការជំងឺឆ្លង កូវិដ១៩ ចំពោះបុគ្គលិក និងកម្មករដែលធ្វើការក្នុងគម្រោងសាងសង់អាកាសយានដ្ឋានទាំងមូល ( Pandemic Prevention and Control) ។
សូមបញ្ជាក់ថា អាកាសយានដ្ឋានរជាតិសៀមរាបអង្គរនោះ មានទីតាំងស្ថិតនៅឃុំពពេល ស្រុកសូទ្រនិគម ខេត្ដសៀមរាប មានវិសាលភាពលើផ្ទៃដីទំហំប្រមាណ៧០០ហិកតា បានចាប់ផ្តើមសាងសង់ពីថ្ងៃទី១៥ ខែមីនា ឆ្នាំ២០២០និង គ្រោងបញ្ចប់នៅថ្ងៃទី១៤ ខែមីនា ឆ្នាំ២០២៣ ក្នុងរយៈពេល៣៦ខែ ហើយអាកាសយានដ្ឋានអន្តរជាតិថ្មីនេះ នឹងចូលរួមចំណែកក្នុងការទាក់ទាញភ្ញៀវទេសចរណ៍មកទស្សនាខេត្តសៀមរាប សំដៅជំរុញកំណើនសេដ្ឋកិច្ចជាតិ ការបង្កើនការងារ និងប្រាក់ចំណូល ជូនប្រជាពលរដ្ឋ និងរួមចំណែកការអភិវឌ្ឍន៍សង្គមប្រកបដោយចីរភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។