អាមេរិក ចាក់សាំងចូលភ្លើងក្នុងទំនាក់ទំនងជាមួយចិន ដោយសម្រេចលក់អាវុធតម្លៃជាង២ពាន់លានដុល្លារឲ្យតៃវ៉ាន
ទំនាក់ទំនងរវាងអាមេរិកនិងចិនតានតឹងនាពេលកន្លងមក ដោយបញ្ហាពាណិជ្ជកម្ម ប៉ុន្តែភាគីទាំងពីរបានយលព្រមពិភាក្សាគ្នា ឡើងវិញក្រោយជំនួប កាលពីថ្ងៃទី២៩ខែមិថុនានៅប្រទេសជប៉ុនបន្ទាប់ពីកិច្ចប្រជុំ G-20 ។
បញ្ហារសើបបំផុតដែលធ្វើឲ្យទំនាក់ទំនងតានតឹងនោះគឺកោះតៃវ៉ាន ដោយអាមេរិកតែងតែលូកដៃចូលបញ្ហាកោះតៃ វ៉ាន់បំពាន់ទៅលើច្បាប់ចិនតែមួយដែលអាមេរិកបានព្រមព្រៀង ។នៅពេលនេះរដ្ឋាភិបាលរបស់ប្រធានាធិបតីអាមេរិកដូណាលត្រាំបាន អនុម័តលក់ រថក្រោះ Abrams និងមីស៊ីល Stinger ឲ្យទៅកោះតៃវ៉ាន ក្នុងពេលដែលប្រឈមភាពតានតឹងជាមួយចិន ។
សារព័ត៌មាន CNN បានផ្សាយថា កាលពីថ្ងៃទី៨ខែកក្កដា សភាអាមេរិកទទួលបានព័ត៌មានស្តីពីក្រសួងការបរទេសអាមេរិក យលព្រមលក់អាវុធឲ្យកោះតៃវ៉ាន់ ក្នុងនោះមាន រថក្រោះ១០៨គ្រឿងប្រភេទ Abrams M1A2T និង សម្ភារពាក់ព័ន្ធ រួមទាំងមីស៊ីល២៥០ដើមប្រភេទ Stinger ។
ជាមួយគ្នានេះរដ្ឋបាលប្រធានាធិបតីអាមេរិក លោក ដូណាល់ ត្រាំ បានយល់ព្រមហើយក្នុងការលក់ អាវុធជាលក្ខណៈទ្រង់ទ្រាយធំ មានតម្លៃជាង ២.២ពាន់លានដុល្លារ ឱ្យកោះតៃវ៉ាន់ បើទោះជាមានការព្រមានពីចិនក៏ដោយ។ រថក្រោះទាំងនេះត្រូវបានគេប៉ាន់ប្រមាណមានតម្លៃ ២ពាន់លានដុលា្លរ រីឯមីស៊ីល Stinger មានតម្លៃ ២២៣លានដុល្លារ។
កាលពីខែមីនា ប្រធានាធិបតីកោះតៃវ៉ាន់ លោកស្រី Tsai Ing-wen បានអះអាងថា អាវុធដែលទីក្រុងតៃប៉ិ បញ្ជាទិញពីសហរដ្ឋអាមេរិក នឹងជួយដល់ដែនកោះមួយនេះបង្កើនសមត្ថភាព ការពារជាតិ ទាំងគោក និងអាកាស ហើយវាក៏បង្ហាញផងដែរពីការប្ដេជ្ញាចិត្តរបស់ទីក្រុងវ៉ាស៊ីនតោន ក្នុងការពារកោះតៃវ៉ាន់។ ប៉ុន្តែ ក្រសួងការពារជាតិចិនធ្លាប់បានព្រមានថាការលក់អាវុធឱ្យកោះតៃវ៉ាន់ អាចនឹងធ្វើឱ្យប៉ះពាល់ដល់ទំនាក់ទំនងទ្វេភាគីអាមេរិក និងចិន ខណៈភាគីទំាងពីរកំពុងស្វះស្វែងរក កិច្ចព្រមព្រៀងបញ្ចប់សង្រ្គាមពាណិជ្ជកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។