គីម ជុងអ៊ុន បើកកិច្ចប្រជុំបន្ទាន់ ក្រោយសង្ស័យករណីដំបូងនៃការឆ្លងជំងឺកូវីដ១៩ នៅក្នុងប្រទេស
កូរ៉េខាងជើង៖ មេដឹកនាំកូរ៉េខាងជើងលោក គីម ជុងអ៊ុន បានរៀបចំកិច្ចប្រជុំគណៈកម្មាធិការគោលនយោបាយគណបក្សកាលពីចុងសប្តាហ៍មុននេះ ដោយនៅពេលនោះ លោកបានទទួលស្គាល់ថា វីរុស COVID-19 ទំនងជាបានចូលមកដល់ប្រទេសរបស់លោកហើយ នេះបើតាមសារព័ត៌មានយ៉ុនហាប់ នៅយប់ថ្ងៃទី២៦ ខែកក្កដា ឆ្នាំ២០២០។
ទីភ្នាក់ងារសារព័ត៌មានរដ្ឋកូរ៉េខាងជើង KCNA បានចេញផ្សាយថា លោក គីម ជុងអ៊ុន បានប្រកាសដាក់ភាពអាសន្ននៅតំបន់ដែលរងការប៉ះពាល់នោះ និង បានចាត់វិធានការជាមុន ចំពោះការបិទទីក្រុងកេស៊ុង ទាំងស្រុង និងបិទការធ្វើដំណើររវាងសង្កាត់នីមួយៗ និងតំបន់នីមួយៗនៃទីក្រុងនេះ កាលពីរសៀលថ្ងៃទី២៤ ខែកក្កដានេះ (ម៉ោងក្នុងតំបន់) បន្ទាប់ពីទទួលបានដំណឹងអំពីរឿងនេះ។
បើតាមទីភ្នាក់ងារ KCNA អ្នកផ្ដាច់ខ្លួនម្នាក់ដែលត្រូវបានសង្ស័យថា បានឆ្លងវីរុស COVID-19 គឺជាអ្នកដែលបានគេចខ្លួនទៅកូរ៉េខាងត្បូងកាលពី៣ឆ្នាំមុន ប៉ុន្តែបានត្រឡប់មកកាន់កូរ៉េខាងជើងវិញកាលពីថ្ងៃទី១៩ ខែកក្កដាកន្លងទៅនេះ បន្ទាប់ពីបានឆ្លងព្រំដែនដោយខុសច្បាប់ ។
ប្រភពបានឱ្យដឹងទៀតថា លទ្ធផលមិនទាន់ប្រាកដត្រូវបានធ្វើឡើងដោយការធ្វើតេស្តវេជ្ជសាស្ត្រមួយចំនួនលើវត្ថុរាវនៃសរីរាង្គដង្ហើម និងឈាមរបស់អ្នកផ្ដាច់ខ្លួននោះ ប៉ុន្តែមិនបានបញ្ជាក់ឲ្យបានច្បាស់ថាតើអ្នកជំងឺនោះ បានឆ្លងកាត់ការធ្វើតេស្តរកជំងឺកូវីដ១៩ ឬក៏អត់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។