ឯកឧត្តម វេង សាខុន បើកកិច្ចប្រជុំ ដើម្បីផ្សព្វផ្សាយទិន្នន័យស្ថិតិកសិកម្ម
ភ្នំពេញ៖ នៅទីស្តីការក្រសួង កាលពីថ្ងៃទី២៤ ខែធ្នូ ឆ្នាំ២០២០ ឯកឧត្តមរដ្ឋមន្ត្រី វេង សាខុន បានដឹកនាំកិច្ចប្រជុំ ដើម្បីធ្វើការផ្សព្វផ្សាយ និងពិភាក្សាអំពីការងារប្រមូលទិន្នន័យស្ថិតិកសិកម្ម និងការបូកសរុបបញ្ចប់ការងារបង្កបង្កើនផលរដូវវស្សាឆ្នាំ២០២០ ដែលរៀបចំឡើងដោយអគ្គនាយកដ្ឋានកសិកម្ម។ កិច្ចប្រជុំក៏មានការអញ្ជើញចូលរួមពីឯកឧត្តម ប្រធានមន្ទីរកសិកម្ម រុក្ខាប្រមាញ់ និងនេសាទទូទាំង ២៥ រាជធានី-ខេត្ត និងមន្ត្រី។
ថ្លែងទៅកាន់អង្គពិធី ឯកឧត្តមរដ្ឋមន្ត្រី បានលើកឡើងថា ស្ថិតិដំណាំកសិកម្មមានតួនាទីយ៉ាងសំខាន់ ក្នុងការអភិវឌ្ឍវិស័យកសិកម្ម ក៏ដូចជាការអភិវឌ្ឍសេដ្ឋកិច្ចទាំងមូលពីព្រោះវាគឺជាសូចនាករណ៍មួយអាចវិភាគ និងឆ្លុះបញ្ចាំងឱ្យឃើញនូវការប្រែប្រួល និងលើកវិធានការដើម្បីទប់ស្កាត់នូវរាល់បាតុភាពអសកម្មដែលជះឥទិ្ធពលមកលើគម្រោង ឬកម្មវិធីអភិវឌ្ឍន៍វិស័យកសិកម្មទាំងក្នុងរយ:ពេលខ្លី និងរយ:ពេលវែង រួមទាំងមានវិធានការទប់ស្កាត់នូវបាតុភាពអតុល្យភាព “រវាងផ្គត់ផ្គង់ និងតម្រូវការ”។
ជារៀងរាល់ឆ្នាំ ក្រសួងបានរៀបចំចងក្រង និងផ្សព្វផ្សាយឯកសារស្ថិតិស្តីពីដំណាំកសិកម្មប្រចាំឆ្នាំ ដែលតួលេខទាំងអស់បានធ្វើការដកស្រង់ និងបូកសរុបដោយផ្អែកទៅលើការធ្វើអង្កេតរបាយការណ៍របស់មន្ទីរ។ ការប្រមូលទិន្នន័យស្ថិតិដំណាំកសិកម្ម បានអនុវត្តដោយផ្អែកលើការបូកបញ្ចូលទិន្នន័យនៅរដូវវស្សា (ចាប់ពីខែមេសា ដល់តុលា) និងរដូវប្រាំង (ចាប់ពីខែវិច្ឆិកា ដល់ខែមីនា)។
យោងលើរបាយការណ៍របស់ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានឲ្យដឹងថាលទ្ធផលនៃការចុះស្រង់ស្ថិតិ ឆ្នាំ២០២០ នៃដំណាំកសិកម្មសម្រេចបានលទ្ធផលដូចខាងក្រោម៖
១. ដំណាំស្រូវមានផ្ទៃដីដាំដុះចំនួន ៣,៣៩០លានហ.ត ទិន្នផលជាមធ្យមប្រមាណ ៣,៣៣ត/ហ.ត និងទទួលបានបរិមាណផលសរុបចំនួន ១០ ៩១៤ ៧០៥ត។
២. ដំណាំសាកវប្បកម្មរយៈពេលខ្លីមានចំនួន ១០២ ១៩១ហ.ត ទទួលបរិមាណផលចំនួន ៩ ៩៩៣ ០៣០ រយៈពេលវែងមានចំនួន ២១០ ៤៥៥ ហ.ត ទទួលបានបរិមាណផលចំនួន ៧២៩ ៩៤៣ត សរុបបរិមាណផល ១០ ៧២២ ៩៧៣ ត។
៣. ដំណាំឧស្សាហកម្មរយៈពេលខ្លីមានផ្ទៃដីដាំដុះចំនួន ៨៧៦ ២៥៣ហ.ត និងទទួលបានបរិមាណផលចំនួន ១២ ៦៦៧ ៩៨៩ត។ ផ្ទៃដីដាំដុះរយៈពេលវែងមានចំនួន ២៤៦ ៨១៥ហ.ត និងអាចទទួលបានបរិមាណផលចំនួន ៣៥២ ២៧៩ត។
ឆ្លៀតយកឱកាសនេះ ឯកឧត្តមរដ្ឋមន្ត្រី បានធ្វើការណែនាំបន្ថែមដល់ថ្នាក់ដឹកនាំអគ្គនាយកដ្ឋានកសិកម្ម មន្ទីរ និងមន្ត្រីជំនាញទាំងអស់ដែលមានខ្លឹមសារទាក់ទង៖
ទី១-អគ្គនាយកដ្ឋានកសិកម្ម ត្រូវសម្រួលការបូកសរុបទិន្នន័យផលិតកម្មដំណាំកសិកម្មចាប់ពីឆ្នាំ២០២០ ដោយចាប់ផ្តើមពីថ្ងៃទី១ ខែមករា និងបញ្ចប់នៅថ្ងៃទី៣១ ខែធ្នូ នៃឆ្នាំនីមួយៗ ពោលគឺបូកទិន្នន័យរដូវប្រាំង ជាមួយនឹងទិន្នន័យរដូវវស្សា។
ទី២-ត្រូវបែងចែកដំណាំសាកវប្បកម្មជា៣ក្រុមទី១-បន្លែ (ផ្លែ ដើម-ស្លឹក-ផ្កា និងមើម) ទី២-ឈើហូបផ្លែ និងទី៣-រុក្ខជាតិលម្អ ហើយត្រូវស្រង់ស្ថិតិទៅតាមក្រុមនីមួយៗ។
ទី៣-ត្រូវបែងចែកដំណាំឧស្សាហកម្មជា៣ក្រុមទី១-ផ្តល់ជាតិម្សៅនិងស្ករ ទី២-ផ្តល់ប្រេង សរសៃ និងសារជាតិញៀន និងទី៣-ជាគ្រឿងទេស ហើយស្រង់ស្ថិតិទៅតាមក្រុមនីមួយៗ។
ទី៤- មន្ទីរត្រូវធ្វើរបាយការណ៍បង្កបង្កើនផលដំណាំស្រូវ ដំណាំសាកវប្បកម្មរយៈពេលខ្លី និងដំណាំឧស្សាហកម្មរយៈពេលខ្លី (ដំណាំរដូវ) ប្រចាំថ្ងៃ សប្តាហ៍ ខែ ត្រីមាស ឆមាស និងប្រចាំឆ្នាំប្រកប ដោយប្រសិទ្ធភាព និងតម្លាភាព។
ទី៥-មន្ទីរត្រូវធ្វើរបាយការណ៍បង្កបង្កើនផលដំណាំសាកវប្បកម្មរយៈពេលវែង និងដំណាំឧស្សាហ កម្មរយៈពេលវែង ប្រចាំត្រីមាស ឆមាស និងឆ្នាំ។
ទី៦- អគ្គនាយកដ្ឋាន និងមន្ទីរ ត្រូវសម្របសម្រួលនិងចុះប្រមូលទិន្នន័យដំណាំកសិកម្ម ទាំងកម្រិតគ្រួសារ ការវិនិយោគនិងក្រុមហ៊ុនដីសម្បទានសេដ្ឋ-កិច្ចឱ្យបានគ្រប់ជ្រុងជ្រោយ។
ទី៧- មន្ទីរត្រូវសម្របសម្រួលកត់ត្រាការនាំចេញកសិផលក្រៅផ្លូវការតាមខេត្តនីមួយៗលើមុខដំណាំសំខាន់ៗ និងរាយការណ៍មកអគ្គនាយកដ្ឋានកសិកម្មជាប្រចាំថ្ងៃ ព្រមទាំងត្រូវសហការក្តាប់ឱ្យបានអំពីការនាំចូលកសិផលតាមច្រកព្រំដែននានា។
ទី៨-អគ្គនាយកដ្ឋានកសិកម្ម និងនាយកដ្ឋានផែនការ ស្ថិតិ ត្រូវរៀបចំប្រព័ន្ធប្រមូលទិន្នន័យឱ្យបានច្បាស់លាស់ គ្រប់ជ្រុងជ្រោយ ដើម្បីធ្វើឱ្យស្ថិតិកាន់តែមានភាពសុក្រឹត។
ទី៩-មន្ទីរត្រូវរាយការណ៍ទិន្នន័យគ្រប់ប្រភេទតាមទម្រង់ដែលបានកំណត់ ទៅស្ថាប័នពាក់ព័ន្ធឱ្យទាន់ពេលវេលា និងមានសង្គតិភាព។
ទី១០- មន្ទីរទាំងអស់ត្រូវក្តាប់ឲ្យបាននូវសកម្មភាពរបស់ក្រុមហ៊ុន អង្គការ និងសហគមន៍នានា ដែលទាក់ទងការងារកសិកម្ម ដើម្បីស្នើសុំកិច្ចសហការតាមគ្រប់រូបភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។